全城正義市民翹首以待嘅「佔領九疑犯」審訊，今日正式展開。由於已經進入審訊過程，囍雨當然就唔會再直接評論事件，以免唔覺意妨礙咗司法公正，咁就大件事喇！囍雨身為香港人，當然就應該守香港法例同尊重香港法治，但作為境外之民嘅英國國會議員就唔係咁諗喇，其中八個所謂跨黨派議員竟然提出聯合議案，要求國會譴責特區政府以「空泛」罪名威嚇民主派（「佔領九疑犯」）。唉，老老實實，到底班英國政客係太無知，定刻意為之？竟然話律政司指控「空泛」？

「古老」罪行豈是「空泛」？

是咁的，既然尊貴嘅英國國會議員如此指控，囍雨本住求真精神，梗係即時睇睇到底呢班議員點講啦。據報，議案係由保守黨人權委員會主席Fiona Bruce提出，獲得來自保守黨、工黨、民主統一黨同蘇格蘭民族黨其他七個議員支持。呢班人要求國會對「佔中九疑犯」對案件表示關注，又指九名疑犯面臨「空泛」同「含糊不清」嘅指控，仲要求英國國會譴責特區政府使用串謀作出公眾妨擾、煽惑他人作出公眾妨擾、煽惑他人煽惑公眾妨擾等罪名去「恐嚇」民主派人士，令到佢哋噤聲云云。

嘩，指控真係好嚴重喎，但嚴重還嚴重，指控一定要「準確」先至得。到底律政司就住「佔領九疑犯」所提出嘅控罪，係唔係真係好似呢班英國國會議員所講咁「空泛」同「含糊不清」呢？定係呢班議員法律常識不足、對普通法認識唔夠深，而且被偏見蒙蔽住雙眼同良知，扭盡六壬為「佔領九疑犯」講好話呢？我哋一步一步嚟，重溫一下香港法律界人士點睇先。

控罪清晰 絕不含糊

曾經做過香港大律師公會主席嘅資深大律師湯家驊曾經分析，話「妨擾罪」係普通法中較「古老」嘅罪行，意即係用不法手段傷害公眾嘅人身、財物或使用公眾空間嘅權利。簡而言之，有關罪行係「古老」，但一啲都唔「空泛」，更加唔係「含糊不清」，如果真係好似英國班議員形容到咁差嘅話，就又點可能喺優良嘅普通法原則下，成為「古老」嘅控罪呢，一早就被推翻啦！傻的嗎？

除咗法律界人士，香港法院其實亦曾經就住控罪進行研究架喎，早前仲已經頒下判決，講明參考過往案例，認為控罪都係喺普通法中獲承認，而且並不違憲，同時亦唔會影響「言論自由」等權利，更直言律政司所提控罪並非涉不公正或者隨意。連司法獨立喺亞洲區首屈一指嘅香港法院都有上述睇法，老老實實吖，囍雨真心唔明呢班英國國會議員憑乜去話啲控罪係「空泛」同「含糊不清」囉。

外國政客一心「抽水」

查實今次已經唔係首次有外國政客就住「佔領九疑犯」單案指指點點，佢哋虎視眈眈，成日諗住點樣「抽水」攻擊中央同特區政府，但提都唔提眾被告當日參與「違法佔領」時係「明知違犯」，亦「講明犯法」，而且會「俯首認罪，完落法治。佢哋而家被控，正如另一位大律師公會前主席石永泰所講，只係「求仁得仁」啫，反而班外國政客不問是非，係都要干預香港法治，用「卑鄙」去形容就最貼切不過喇！

原圖：Takungpao