近日睇到一單新聞，內容係指「佔中」前夕，壹傳媒旗下《蘋果日報》嘅記者邀請好幾個運輸業團體去到蘋果日報大樓「共商大事」；據的士司機從業員總會秘書長黃大海憶述，當日會議係由其中一名「佔中」搞手主持，會上多次向運輸業界諮詢堵路地點，不過該會嘅代表由於擔心影響普羅大眾同其他的士司機生計，於是當場反對，會議最後亦喺爭拗聲中結束。四年過去，呢單嘢今日先至爆出嚟，社會反應自然唔會好大，但係大家諗深一層，一個本應客觀報道嘅傳媒機構，竟然成為抗爭行動嘅參與者，直接參與籌劃「佔中」，大家真係覺得冇問題呢？

新聞媒體不能參與政治事件

首先，囍雨必須講清楚：媒體可以有自己立場，但所謂嘅立場，前提係佢自己並非參與者，而係以一個獨立第三方身份觀察事件後，得出自身嘅結論。今次壹傳媒直接參與籌劃「佔中」，最明顯嘅問題就係佢哋「自編自導自演」製造新聞！傳媒行業之所以珍貴同重要，在於傳媒扮演咗市民眼睛同嘴巴嘅角色，專業嘅傳媒中人，絕對唔應該親自介入政治事件，更加唔應該成為新聞事件嘅主角，最重要都係企開一步去客觀觀察，再將事件轉述畀市民知道。

壹傳媒親自落場策劃「佔中」，客觀效果係乜呢？大家試諗諗，佢哋促成呢件歷時79日嘅違法事件發生，事件期間又不斷以「報道」為名，直接間接咁呼籲、鼓勵、煽動市民參加，將傳媒變成宣揚一己政治理念、破壞香港法治核心價值嘅私人工具，甚至令到香港市民之間關係嚴重撕裂、社會分化、家庭不睦，話壹傳媒有份搞亂香港，真係一啲都唔算誇張。

參與政治行動 媒體變「政客」

壹傳媒直接介入政治事件，旗下媒體嘅報道自然難免偏頗兼失實；無他嘅，因為由佢哋直接參加政治事件之後，壹傳媒再冇資格自稱為「傳媒」，佢哋同懷有政治目的嘅政客係完全一樣，已經係不折不扣嘅「政治人」。不過最卑鄙嘅始終佢，壹傳媒將自己直接參與籌劃「佔中」呢件事去收收埋埋，繼續以「新聞」去包裝政治宣傳，令香港市民受盡誤導，呢種低三下四嘅處事方式，枉稱有第四權有監察能力的媒體。

老老實實，壹傳媒介入政治、操控政客、製造政治新聞，其實早於「佔中」之前已經存在。大家記唔記得，當日有傳媒踢爆，壹傳媒老闆黎智英其實就係香港各大反對派政黨嘅最大金主，唔少反對派政客都收過黎智英嘅「政治獻金」；大家不妨再諗一諗，班政客收黎智英錢、平日反覆接受黎智英旗下媒體訪問、選舉前後黎智英旗下媒體又大量採訪同報道一眾收過黎智英嘅政黨，單係睇呢個循環相信大家都已經明白，壹傳媒本身已經香港政治一部份。

壹傳媒沒資格稱為「傳媒」

壹傳媒披住「傳媒」外衣去參與政治行動，違反晒一切新聞道德、操守同守則，大言不慚話佢係香港良心？真係名副其實恬不知恥。香港市民，大家真係覺得，香港有間咁嘅「傳媒」都冇問題？

圖片來源：Takungpao