近日，法國總統馬克龍同美國總統特朗普不斷隔空打口水戰，特朗普話喎，如果冇美國幫手，法國喺兩次世界大戰裡面一早畀人滅左國啦！作為法國國家元首，馬克龍聽到點會唔嬲到震，馬上回應話，法國同美國的確係盟友，但雙方關係並唔係「附庸國」，兩國必須互相尊重。囍雨認為，雖然特朗普講既的確係史實，但作為美國元首，竟然用呢種目中無人既輕蔑態度對待其他國家，剩係呢種操守都已經夠昨「乞人憎」 ；雖然係咁，我哋必須公道少少，皆因問題並非特朗普獨有，美國自恃係世界一哥，介入人哋內政、對其他國家指手劃腳周圍已經唔係第一次，只不過今次換咗做法國中槍啫！

輕蔑態度 早已存在

要分析美國自大嘅本質，真係講幾日都講唔完。早係越戰年代（五十至七十年代），美國對住其他國家就已經囂張到不得了。當年，有美國記者訪問時任新加坡總理李光耀，其中一條問題竟然係：「美國作為大哥，各方面都幫你唔少，雖然新加坡得區區兩百零萬人，但為表誠意係咪應該出兵去幫美國手打北越呢？」哇，區區一名美國記者竟然以極囂張態度訪問另一個國家嘅政府首腦，囍雨翻查資料時真係睇到眼都突埋。李光耀既回應亦都非常強硬啦，指出新加坡唔係美國附庸，出兵幫美國唔屬於「責任」；單係睇呢一件小事，已經可以睇到美國係幾咁囂張同目中無人。

或者有人會話，都已經幾十年前嘅事啦，或者美國今日已經唔係咁呢！錯喇，情況一樣係咁。就今年之嘛，菲律賓總統杜特爾特公開踢爆，話包括美國國務卿蓬佩奧、商務部長羅斯，以及國防部長馬蒂斯都曾經寫信畀佢，游說菲律賓購買F-16戰機等美國軍備，話咁樣對雙方都有利喎。杜特爾特唔係傻仔，一於斷言拒絕，仲話F-16對菲律賓來說根本無用，菲律賓只係需要輕型飛機同攻擊直升機，足夠對付叛軍便就可以。呢，呢啲咪就係當人傻仔囉，上屆政府不滿杜特爾特打擊毒販，當時已經搞到杜特爾特發晒脾氣，以為換咗屆會好少少啦，點知原來都係自行自利，唔通美國仲當菲律賓係120年前嗰個美國殖民地？

憎人富貴厭人貧

當然，美國可以咁囂張，全因佢哋係世界第一大經濟體，有錢之餘，軍備亦相當勁，講嘢自然會大聲啲，明白嘅。不過，美國為咗保住呢份囂張，其實都花咗唔少心力，一見到其他國家經濟稍為起飛，美國馬上就槍打出頭鳥，好似事事以美國馬首是瞻嘅日本就係最好例子；二戰後日本被迫改變治國方針，以貿易立國，集中發展經濟，結果創造出世界歷史上其中一個「經濟奇蹟」，成功取得世界第二大經濟體嘅地位。眼見「細佬」有機會迎頭趕上，美國立刻威脅日本，出手要日本「自主限制」，強迫對方打開國內市場進口更多美國商品。

做咁多衰嘢，目的其實就係怕世界第一經濟體嘅地位被取代，令到美國失去對世界嘅影響力；可憐既日本，就係喺美國呢種「憎人富貴，厭人貧」既思想下成為犧牲品。做晒細佬、認晒低威都得唔到大佬諒體，有時睇返都覺得日本「慘慘豬」。咦，講到呢到，唔知大家有無發現，美國出手打世界第二大經濟體嘅歷史又重演呢？係囉，咪就係中美貿易戰囉，美國點解要開打貿易戰，睇返囍雨上面所講嘅史實，似乎就可以搵到端倪喇。