立法會九龍西補選進入「最後直路」，仲有唔夠兩個星期就正式投票，各個候選人基本上已經「法寶盡出」，有啲候選人就搞造勢大會宣傳、有啲就強調呢個議席對自己陣營幾緊要，要求大家無條件支持佢云云。廣男睇新聞，見到公民黨主席梁家傑話如果畀建制派贏出今次補選，建制派就可以為所欲為，包括23條、國歌法「話過就過，如入無人之境」，但事實又係唔係咁呢？若然選舉由代表建制派嘅候選人勝出，香港議會嘅生態會出現乜嘢變化呢？

對民生才是關鍵一席

廣男平日都好少認同梁家傑講嘅嘢，但今次亦不得不認同，呢個議席的確好關鍵，之不過關鍵並唔係在於23條或者國歌法立法等問題，而係在於到底廣大市民認為香港政客聚焦改善民生、發展經濟重要啲，定係想議會爭拗無日無之，畀班盲反政客可將政治同私人政治恩怨帶埋入民間。即係話，今次補選之所以重要，全因選民再有一次機會去表態：選擇反對、激進嘅勢力，定係支持關注民生嘅力量，又還是係兩邊都唔畀面嘅候選人？廣男相信今次選舉就係一個好好嘅風向標。

仲有一點，就係若然今次補選最終由反對派代表勝出成功入局的話，立法會裡面直選議席中，建制派同反對派嘅比例將會變成17對17，要進一步修改《議事規則》懲罰一眾開會玩嘢、衝擊、搗亂、阻撓會議進行嘅 議員，相信就比較困難、冇乜成功機會。但係相反，若果係建制派代表勝出的話，法會「議事規剛」就有望進一步修訂，任何議員想搞事，甚至係喺議事堂裡面使用暴力，咁就要面對「停賽」（禁止開會）、「罰款」等後果，至少都可以起到一定震懾作用吖！

反對派並非關鍵一席

梁家傑無啦啦將今次補選同23條立法、國歌法等等拉埋嚟講，無非都係想幫「自己友」助選同拉票啫；勢估唔到梁家傑堂堂「資深大律師」，為咗「政治」兩個字居然連人格都唔顧，係咁講大話，呢個毫無疑問係香港嘅悲哀。事實上，以今時今日來講，23條、國歌法若然要喺立法會通過，只需要用「簡單多數」方式表決即可，以而家立法會入面建制派佔多數嘅情況下，多一個反對派、少一個反對派，其實真係無關宏旨。特區政府已經講明，23條立法係要喺社會氣氛接受嘅情況下先至會去做，至於國歌法立法就已經成為「憲制責任」，選邊個入去立法會都係不得不做。所以話呢，梁家傑，唔好再講大話啦，呃唔到人架喇。其實，既然個議席對於你哋反對派咁緊要，咁點解唔好好珍視，掛住玩「政治騷」呢？

現時立法會九龍西補選共有五名候選人，包括伍迪希、曾麗文、李卓人、馮檢基同陳凱欣。

原圖：Takungpao