嘩，囍雨做咗咁多年人，真心未見過一個國家嘅領導層可以咁厚顏，講緊嘅係美國副總統彭斯。呢位美國政客平日表現出態度都算謙謙君子，同佢上司，即係總統特朗普形成強烈對比，但大家千萬唔好畀佢外表欺騙咗，其實彭斯嘅處事方式同特朗普一模一樣，都係為咗個人政治利益，乜嘢都講得出口。最近，彭斯接受《華盛頓郵報》訪問，公然警告中國，又提出一系統要求，話若然中國唔同意，可能就會引發「新冷戰」！嘩，好嚴重呀，到底係乜要求咁巴閉呀？

彭斯言論內容偏頗

彭斯訪問內容，各大傳媒都有報道，大家有興趣就自己搵返嚟睇啦。囍雨個人就覺得，彭斯所提嘅一系列對中國嘅要求中，以「尊重國際規則及規範」同埋「保障在國際水域航行自由」兩呢樣最為可笑；敢問副總統一句，同美國相比，中國幾時有拒絕「尊重國際規則及規範」？中國國家領導人一直提倡嘅方針，由始至終都係「和平崛起」、「擱置爭議」、「共同發展」，國家主席習近平同埋其他中方官員亦多次重申：「無論中國發展到哪一步，中國永不稱霸、永不擴張、永不謀求勢力範圍，歷史已經並將繼續證明這一點。」

相比起嚟，美國又點呢？剩係講「中美貿易戰」呢一樣，美國一方無視世界貿易組織嘅仲裁機制，擅自向中國發動貿易戰、對中國貨品開徵龐大關稅，講問副總統，乜咁樣都叫做「尊重國際規則及規範」呀？仲有仲有，講到「唔尊重國際規則及規範」，當今世上又有邊個國家及得上美國喎，其他唔講住，剩係講氣候同全球暖化，美國單方面退出《巴黎協定》，隨時令到2100年全球升溫幅度達到攝氏3.6度，呢種咁自私嘅決定，試問又點稱得上「尊重國際規則及規範」呢？

美國最不守國際規矩

唔講氣候，講吓和平同地區安全問題吖，美國單方面（又係單方面呀！）退出伊朗核協議，宣佈全面重啟制裁，即時令到中東地區局勢變得異常緊張，一個唔覺意仲可能令到伊朗把心一橫重新走上發展核器道路；除咗伊朗之外，美國亦單方面（又係單方面呀！）退出同俄羅斯之間嘅《中程導彈條約》，意味住兩個大國隨時會再次走上軍備競賽之路，乜美國所作所為真係稱得上「尊重國際規則及規範」咩？

至於話中國要「保障在國際水域航行自由」，呢個要求其實同樣好好笑。老老實實，美軍軍艦無視中國反對，先後喺今年七月同十月駛入台灣海峽，舉動即時引起兩岸局勢緊張。雖然擺明係挑釁，但中國方面亦從來冇過激回應，中國外交部亦只係向美方表達關切，以及敦促美方格守「一個中國」原則、中美三個聯合公報規定，中國充分尊重、保障美國喺國際水域航行自由，彭斯作為搞事嘅一方仲好意思拎出嚟講，面皮真係厚到冇人有。

美國只關心自身利益

講到底，美國政客平日永遠一副道貌岸然，又經常高舉所謂普世價值去干涉其他國家內政，講得講得好似好好聽、做亦做得好似好好睇，但去到尾其實咪又係為咗自己利益、「有奶便是娘」囉！美國嘅超級金主兼中東盟友沙地阿拉伯，被指派人入土耳其刺殺同肢體一名沙地嘅新聞工作者，美國明知沙地錯晒架喎，但咁又點？特朗普咪仍然堅持向沙地售武！算把啦，美國！

 圖片來源：新華網