真係愈來愈討厭同鄙視嗰位世界唯一超級大國嘅元首。係囉，咪就係同四仔女星搞婚外情、稅務問題唔清唔楚，仲涉嫌畀掩口費啲小三，等對方唔可以喺競選期間「爆佢大鑊」嗰位美國總統特朗普囉。作為美國呢個最喜歡干預人哋內部事務嘅國家元首，特朗普不時批評其他國家嘅法治同人權，但偏偏佢自己就成日表演「政治凌駕法治」，真係好諷刺。最近，特朗普又想繞過法律要求同點票程序，直接宣佈自己黨友喺地方選舉勝出，真係睇到囍雨「O晒嘴」呀！

無視法律干預點票

話說美國中期選舉剛剛結束，少數幾個地區由於候選人票數非常接近，需要重新點票，其中就包括佛羅里達州州長同參議員兩項選舉，兩項選舉中得票最多嘅兩名候選人，彼此票數相差不足0.5%，根據當地法例要「自動」重新點票。

票數相近，需要重點，藉以確保選舉公平公正，呢種安排根本係正常不過，何況今次係根據法律而做，係「自動」重新點票，完全冇爭議可言。偏偏，呢個一直視法律如無物，覺得自己行政權力大於法治嘅特朗普就唔係咁睇，認為既然冇證據證明選舉有舞弊，根本就唔需要重新點票，應該以最初開票結果為依歸，判定共和黨人獲勝！嘩，真係好得人驚囉！

亂提陰謀論 遭執法人員反駁

特朗普仲話，佛羅里達州選舉點票嘅最後階段，突然出現大量支持民主黨候選人嘅選票，直接令到民主黨同共和黨嘅得票差距拉近。特朗普想暗示啲乜，囍雨唔敢揣測，不過佛州執法人員就講到明，完全冇證據顯示有人造假；當地負責選舉嘅官員亦解釋，上述情況，全因為大量郵寄選票同部份冇用機器去投嘅選票運到點票中心。

成件事，誰是誰非太清楚。囍雨唔關心佛羅里達州選舉邊個贏，最擔心係特朗普無視法律要求同法律制度，咁先至最大鑊！事實上，特朗普當法律係「死嘅」已經唔係第一次，早排之嘛，呢位元首吹得就吹，話行政命令已經可以廢除「出生地公民權」呢樣美國憲法保障嘅權利，意即佢認為行政權力可以凌駕憲法，冇人可以監察到佢。仲有仲有，佢幾日前就示範點樣打壓新聞自由、任意取消記者嘅白宮採訪證，大家撫心自問，呢種人做美國總統、成日藉故攻擊、批評包括中國在內嘅其他國家，你話可唔可怕喇？

美國再無公義正義可言

特朗普呢種「政治凌駕法律」嘅狂人，以為自己係美國總統就可以為所欲為。呢種人以「正義」自居，又話要「美國優先」，更以此為由任意批評其他國家，但當問題發生喺自己老友或者金主（向美國購買武器的沙地阿拉伯，疑派人殺異見記者）身上，佢又可以噤若寒蟬、當冇事發生過喎。美國畀呢種人領導，乜仲有道理可言咩？算把啦！

圖片來源：新華社