曾經有一套講賽車（嚴格嚟講係非法賽車）電影講過，「神」其實都係「人」，呢種「人」之所以被稱為「神」，全因佢做某啲事做得極出色，去到能人所不能地步。呢種「神一般嘅人」，喺世界上的確存在，皆因唔同範疇裡面都肯定有「神級高手」，唯獨民主選舉，就絕對冇「神」。不過咁，資深大律師、盲反派元老級政客李柱銘近排似乎已經唔滿足做「神級」，而係想做真正嘅「神」，事關立法會九龍西補選票都未到，李柱銘已經呼籲馮檢基支持者轉投李卓人，因為馮檢基今次係毫無勝算，仲叫人2020年換屆選舉先投票畀馮檢基喎。剩係睇呢兩句，大家都睇到李柱銘又有瘋狂：筆者好想知李柱銘又點知馮檢基一定輸呢？佢又知馮檢基2020年一定選嘅？唔通佢真係當咗自己係「神」呀？

為何不支持馮 就要支持李？

李柱銘作為資深大律師，廣男覺得佢嘅思維邏輯應該好嚴謹先啱，但佢呢個「馮檢基無勝算，大家票投李卓人」嘅邏輯，廣男就真係覺得好有問題喇。首先，喺暫時無乜民調可以參考嘅情況下，其實邊個贏都好難講，所謂波係圓嘅，唔打到最後一刻，李柱銘又憑乜斷言馮檢基一定冇勝算呢？馮檢基喺九龍西服務幾十年，反而李卓人幾個月都冇，佢憑乜話馮檢基「輸硬」？況且，OK，就當馮檢基真係冇勝算，咁點解佢嘅支持者唔可以照投票畀佢以示支持呢？民主選舉嘛，大家唔係應該投畀心儀人選咩？選民幾時需要你呢個過氣政治人物指指點點呢？

馮檢基講得好啱，就係李柱銘呢班「元老」玩欽點，更加顯示到盲反派元老級人馬對民主價值信念唔夠強。李柱銘曾經作為「民主派」元老級人馬，唔係好崇尚民主嘅咩？而家成班盲反派「圍威喂」傾個所謂「民主派共同推舉嘅候選人」出嚟，一直拒絕藉初選搵出代表反對派嘅代表，乜咁樣又合乎民主精神咩？呢種只畀「欽點人物」參選，唔畀其他人參與嘅行為，真係好霸道！

不必趕盡殺絕

廣男呢排觀察選舉新聞、輿論，有一種非常古怪嘅感覺，就係反對派人士打壓馮檢基嘅力度，似乎仲多過「對付」陳凱欣；廣男唔知呢一種係咪好嘅選舉策略，但有一點廣男非常肯定嘅，就係反對派過份打壓「同路人」，可能會令到自己啲支持者都覺得反對派去得太盡，最終令支持者捨棄反對派。所以呢，如果反對派主流人物仲想保持少少風度，就唔好去到咁盡，一時話人收錢，一時又屈人係同性戀啦！

現時立法會九龍西補選共有五名候選人，包括伍迪希、曾麗文、李卓人、馮檢基同陳凱欣。 

原圖：RTHK