日前喺深水埗港鐡站，一名女警為制服持「鎅刀」所以開槍，成為本港第一個開槍制伏疑犯嘅女警。本來一名女警為咗自衛開槍，係一件好合理嘅事，不過唔知點解，事後就有唔少人質疑個女警點解要開槍，有啲就係咁問女警開槍係咪合乎程序、指引，有啲就話怕誤中流彈。廣男就喺度諗，如果個女警當時生命安全受到威脅都唔用必要方法制止，咁佢連自己都保護唔到，又點保護到市民呢？若然警察依例執法都要受盡各方質疑，以後仲有邊個敢執法？

還原事件真相

喺女警開槍制伏持刀疑犯一事曝光後，有傳媒就取得附近店鋪嘅閉路電視片段，事情就係一男一女警員喺港鐵站見疑犯形跡可疑於是上前截查，點知疑犯喺呢個時候竟然「亮刀」，首先撲向男警員，男警員避開後就將目標轉向另一邊嘅女警，女警一邊拔槍一邊避，期間警告疑犯「咪郁」，但疑犯依然窮追不捨，女警於是就向疑犯開槍。根據呢段傳媒嘅描述，我哋唔難得出一個結論，就係個女警當時的確有危險，甚至係威脅到佢生命安全嘅危險。

警員朱振國曾被刀刺傷至癱瘓

有啲人質疑，女警係咪有必要開槍，其實據悉當時女警開槍前已經評估過，係咪可以用胡椒噴霧或者警棍將對方制服，但從距離以至危險程度睇嚟，兩者都未必制服到疑犯。喺呢度，廣男想同大家分享一個故事，喺2005年，軍裝警員朱振國巡邏時畀一名青年用刀刺傷左後頸大動脈後癱瘓，至今仲喺療養院養傷；自朱振國事件後，警員都對持鎅刀者好小心，所以當啲人質疑女警有冇需要開槍嘅時候，其實只要問下自己，如果自己係警員而生命受到威脅時，又會唔會開槍自保呢？廣男相信答案好明顯。

誠如朱振國妻子言，今次女警情況十分危險，為自保決定開槍係「醒目」做法，亦比佢丈夫朱振國幸運。老實講，好多時當我哋從局外人嘅角度去質疑其他人例如警方，往往都係相當容易，但當我哋切身處地去諗下人哋嘅處境嘅時候，就會知道人哋作出決定（開槍）好多時都只係迫不得已。警方回應事件嘅時候，已表明根據初步調查，確定女警係根據武力使用守則制止暴力罪行，廣男覺得大家都唔應該再質疑啲咩，如果警察依法辦事但下下都被質疑，以後仲有邊個願意果斷執法呢？  

原圖：Takungpao