由民主黨立法會議員許智峯（癲鴿峯）喺立法會搶女政府人員手機開始，囍雨都唔知寫咗癲鴿峯幾多次，不過佢嘅罪狀有時真係多到「寫都寫唔晒」，最近佢又新添一項「戰績」，就係攞住個大聲公喺中西區區議會同主持會議嘅主席「鬥大聲」，最後搞到會議流會。其實，癲鴿峯有不滿係佢嘅事，但佢搞到會議流會、其他議程都討論唔到，根本就係靠害！

不滿意議程 = 可以搗亂？

今次癲鴿峯「搞事」嘅原因，係因為佢想喺區議會討論沙中線問題，但遭到拒絕，於是佢就喺會議度攞個大聲公出嚟同主席「鬥大聲」，會議擾攘咗個幾鐘之後，主席迫於無奈嘅情況下唯有宣布流會。囍雨就覺得，癲鴿峯唔滿意議程，當然可以，但如果有人唔滿意會議程序或者其他嘢就可以搞到會議流會，咁以後區議會仲有秩序可言嘅？係咪成個區議會都要聽晒癲鴿峯一個人講嘢先？

癲鴿峯用大聲公搞破壞，同佢喺立法會搶女EO手機，其實係出於同一諗法：當佢以為「自己啱晒，人哋唔啱」嘅時候，佢就「做乜都得」。大家諗下，果時佢搶女EO手機，明明公開道歉過，但之後就「轉軚」話自己係為公義，想老屈番個女EO轉頭，話侵犯佢議員私隱，不過連私隱專員都KO佢，話女EO喺立法會做紀錄根本冇違法！所以今次見區會議程無佢想討論嘅議題，又痴又癲嘅癲鴿峯點會唔搞事？只不過佢而家成日將區議會變成「戰場」，阻礙議會運作、民生事務推展，小心會引起區內民居不滿！

惡行纍纍 早晚自招惡果

老實講，近呢幾個月癲鴿峯好似「越玩越癲」咁，一時又畀人揭發佢疑似偷電，一時違泊，一時又喺區議會推撞其他同事，如果唔講佢係民主黨議員，其他人分分鐘以為佢係屬於最激進果班本土派。奇怪嘅係，癲鴿峯作為民主黨嘅立法會議員加區議員，民主黨好似對佢不當行為完全視而不見咁，之前話要紀律聆訊佢單嘢都押後埋；囍雨就喺度諗，到底係民主黨已經放棄咗癲鴿峯，定係民主黨本身都已經變咗質，由「和平、理性、非暴力」，變成「暴力、激進、非和平」嘅政黨呢？如果民主黨黨格不變，出嚟回應下許智峯啲「罪行」好喎！ 

原圖：陳學鋒議員辦事處Facebook