民主黨立法會議員林卓廷同尹兆堅發起「天下為公」計劃，不斷炒作UGL事件，繼之前去英國投訴梁振英事敗後（英國三個執法機構都表示梁振英冇喺英國犯罪或者不作調查），就轉戰澳洲，去澳洲報警兼見律師；林、尹番嚟香港後見記者，話同澳洲警方接觸後，果邊警方覺得「情節比較嚴重」、「指控相當嚴重」等等。聽到呢兩位「議員」咁講，真係唔識就畀佢哋嚇死、識就畀佢兩個笑死！「情節比較嚴重」？「指控相當嚴重」？梗係啦，出自你兩個充滿偏見嘅人把口喎，情節又點可能唔嚴重？指控又點可能唔嚴重先？

情節嚴重 = 林、尹講到「好嚴重」

廣男平時喜歡睇書，有啲睇過啲書係關於哲學嘅，對於點樣分析一個人講嘅嘢有咩含意都有少少心得；如果要分析林、尹「情節比較嚴重」、「指控相當嚴重」呢兩句說話，其實好簡單，意思應該係澳洲警方聽完林、尹對梁振英嘅指控後，覺得林、尹「所講嘅」情節或者指控相當嚴重，件事本身係唔係真係有Case或者涉及犯罪呢，咁就要等澳洲警方或者其他執法機構查過先知。不過，觀乎佢哋上次去英國亂告狀事敗嘅先例，佢哋今次「運桔」嘅機會都唔少。

老實講，任何去報警、去執法機構舉報，基本上都可以將案情「講到」好嚴重架喎，講之嘛，點會唔嚴重，尤其係出於你班盲反派嘅口，就肯定冇事變有事添啦。嗱嗱嗱，隨舉一例咋，好似民主黨成員（嘩！又係民主黨喎！）林子健早前疑似「自編自導自演」話自己畀內地人綁架兼喺佢大髀釘上書釘，佢出嚟開記者會同之後報警都講到好嚴重架喎，但後來又點？後來咪就係畀警方起訴佢虛報有人犯罪囉！當然，單案仲未審結，林子健至今仍然係無辜架，廣男只係想帶出，報案人口中所講內容，有時同實際調查出嚟情況的確可以有好大出入，大家唔好大驚小怪啦！

林、尹跟警方說甚麼？

講來講去，大家其實至今都唔太清楚，到底林、尹呢兩位政客同澳洲執法部門講咗啲乜。以佢哋身伙局外人、並唔執法部門、沒有搜查權、沒有調查權嘅身份，只係單憑全世界都接觸到嘅資料就走去同澳洲警方講有人疑似違法、涉嫌違反董事誠信、做咗特首仲「收錢」等等，先唔好講內容有幾唔可信先，單係被投訴嗰個梁振英係中國副國級領導人呢一點，人哋澳洲警方聽到好自然都會話「情節嚴重」（涉及中國副國級國家領導人喎，仲唔嚴重？），咁到底有咩咁特別呢？仲有仲有，請問佢哋有冇同澳洲警方講，UGL協議係各方知情、梁振英事先得到戴德梁行董事局主席書面同意去同UGL傾個協議？又份協議係由執業律師起草、梁振英仲親手寫明協議「唔可以涉及利益衝突」呢？

以上問題答案係乜？香港市民，你們懂的！

原圖：《港人講地》