呢次勁喇，堂堂美國總統，竟然喺白宮記者會上驅趕主流傳媒記者離場，仲要即時取消埋呢名記者嘅採訪證，令佢唔可以再入白宮裡面採訪！美國喎，嗰個所謂嘅民主大國喎，嗰個所謂好尊重「新聞自由」、好講「言論自由」嗰個國家喎，大家冇聽錯吖嘛？真係冇錯架，而且仲要有片為證添，身為世界上最高權力嘅男人，特朗普總統竟然連一個小小嘅記者都容不下，你話係唔係好諷刺先？香港班盲反派政客終日以美國馬首是瞻，前一排因為香港外國記者會（FCC）馬凱事件又喺立法會喊打喊殺，唔知呢班人對美國發生呢件事又有咩睇法呢？

特朗普打壓「新聞自由」

件事係咁嘅，話說特朗普喺白宮舉行中期選舉後首場記者會，CNN安排記者阿科斯塔出席提問；期間，阿科斯塔多次質疑特朗普刻意將中美洲難民妖魔化，又問特朗普點解距離美國仲有一大段距離嘅難民係「侵略」，結果疑似因為咁激嬲特朗普，即時被喝令收聲同放低支咪。美國總統落命令喎，白宮裡面班馬仔即時做嘢啦，一個白宮女實習生即時上前想搶返阿科斯塔支咪，但阿科斯塔死都唔制，仲堅持就俄羅斯干預美國大選一事質詢特朗普。

事情發展到呢度，出名小器嘅特朗普又點會就咁算吖；白宮其後取消阿科斯塔張記者證，禁止佢進入白宮，又指控佢阻止白宮女實習生工作，做法不能接受。睇到呢度，誰是誰非真係好清楚，CNN個記者只係盡題提問，所問嘅內容完全不涉及特朗普私人生活，全部都係針對佢嘅施政內容而問，特朗普拒絕回應本身已經好有問題，最終仲要搞到取消記者證、唔畀呢名記者再入白宮採訪，呢啲咪就係打壓「新聞自由」囉！問我唔鍾意聽嘅問題就唔畀再入嚟採訪，呢啲仲唔係打壓？

香港盲反派政客貽笑大方

睇到特朗普咁嘅行為，再回首諗諗香港班盲反派政客，囍雨心裡面只係得四個字：「搖頭嘆息」。上星期之嘛，盲反派政客毛孟靜話要傳召特區政府官員，要佢哋解釋唔續簽證畀馬凱嘅理由，又話驅逐記者係「事無前例」咁話喎。馬凱疑似因為唔做好新聞工作本份，喺工餘時間為「港獨」份子陳浩天搭建宣傳平台，最終不獲續批簽證，特區政府呢種處理手法，簡直係國際標準啦。偏偏香港盲反派係都要將件事拉上去「新聞自由」嚟講，真係卑鄙。

嗱，今日特朗普就完美咁示範乜嘢叫做打壓「新聞自由」喇！CNN記者真係盡本份問問題咋，並唔係從事分裂國土行動都畀人驅逐唔畀入白宮採訪，你班盲反派政客咪好喜歡去美國告狀，成日要去美國國會唱衰香港；班「港獨」份子又好喜歡寫信叫美國制裁香港吖嘛，不如你班人組團，齊齊去美國請教吓人哋乜嘢叫做打壓「新聞自由」先啦！

原圖：新華社