港珠澳大橋通車，大大方便咗香港、珠海同澳門居民往來三地；由於東涌係最近港珠澳大橋香港口岸嘅新市鎮，所以近日有唔少內地旅客都去東涌「一日遊」，令到當地嘅交通以至社區設施負荷增加。喺呢個時候，囍雨除咗見到例牌炒作有關內地新聞嘅《生果報》話「東涌淪陷了」之外，囍雨仲睇到本土派地區組織「東涌人」代表王進洋聲言要搞「光復行動」；睇到呢度，囍雨不禁要問一句，王進洋係咪要借事件博出名，踩住旅客嘅「膊頭」上位呢？

王進洋與「港獨」份子關係密切

呢個「東涌人」王進洋喺2015曾以「本土派」、「傘兵」身份參選區議會東涌南選區但以200票之差輸畀民建聯周浩鼎；據報，王進洋除咗曾經同本土民主前線前發言人梁天琦助選過之外（梁天琦已入獄），亦曾經同「港獨」份子陳浩天以至譚凱邦等交往過。今次佢聲稱要喺東涌發起「光復行動」為咗乜？會唔會係為選票、博出位呢？

一切都是為了選舉？

王進洋喺2015年只係輸畀周浩鼎少少，囍雨睇佢Facebook一直關注東涌事務，相信佢喺下年嘅區議會絕對有機會捲土重來；而家食正東涌受到旅客過多的問題所困擾，只要王進洋「成功抽水」，喺東涌建立到佢反內地旅客、要維持東涌寧靜嘅形象，到時如果真係選舉，咁無論係佢嘅名氣抑或勝算，多多少少都會「增加」啦！

關注區內事務、唔想自己關注嘅社區「迫爆」，其實係應該嘅，話晒而家大橋嘅交通配套未完善，旅遊業界同政府都要加把勁處理。不過，但如果要用到「光復行動」，甚至狙擊旅客嘅手法，囍雨就相當唔同意喇！更何況所謂「光復」行動都有暴力前科，亦難免造成肢體或者言語上嘅衝突，大家唔知記唔記得，當年有人搞光復屯門、元朗等行動，開頭都係威係勢，但自從有次喺「光復」期間有人推倒老人家、嚇親小朋友之後，班「本土派」形象即刻插水，甚至連啲本土派政客都同行動「割蓆」，香港「好客之都」嘅形象都插水，其實旅客多同地區承受力問題，做好疏導嘅工作，既可顧及大橋帶來嘅經濟效益同地區民生問題。囍雨奉勸王進洋等人係諗住務實解決問題，例如向政府提出建議，咁做絕對可以，但若然用上「光復」等可能出現暴力嘅手段解決問題，結果可能會得不償失，班本土派都係諗清楚比較好。 

原圖：RTHK