為咗炒作UGL事件、借唔同政治議題提升人氣，民主黨立法會議員林卓廷同尹兆堅，喺英國執法機構表明全國政協副主席梁振英無觸犯英國法例、即係UGL事件無Case嘅情況下，日前去咗澳洲聲稱要繼續舉報UGL事件，仲聲稱自己同澳洲警方交代咗UGL事件嘅資料後，對方認為「案件相當嚴重」，講到「好大件事」咁；不過，猶記得林、尹二人去英國「舉報」時都係吹到有咁大得咁大，前車可鑑，囍雨好懷疑林、尹二人都係「冇料扮四條」，借去澳洲畀人知佢地有做野啫！

到英國炒作UGL 反還了梁振英清白

所謂假的真不了，林卓廷同尹兆堅不斷炒作UGL事件講到有乜問題、有乜疑點，但講嚟講去，都無實質證據，其實似砌緊梁振英「生豬肉」咁；今次佢哋去埋澳洲做舉報，仲話澳洲警方代表「認為案件相當嚴重，涉及海外的貪污指控」，又信唔信得過佢哋呢？

其實只要睇下林、尹二人之前喺英國舉報梁振英果時做過啲咩、講過啲咩，都唔難得出一個結論，就係呢二條友又喺度無風起浪！佢哋大約喺兩個月前去英國，當時聲稱同反貪組織透明國際（Transparency International）嘅代表會面，仲引述對方話「UGL案存在相當的可疑點，應該於英國進行相關調查」，不過透明國際其實只係民間智庫組織，根本無實質調查權，林卓廷擺明只係借佢個名黎吹大件事。；之後佢哋見英國「打擊罪案調查局（NCA），又引述英國資深大律師意見，話關於UGL事件「根據現在所掌握的所得資料，是有充足的理由去展開調查」。

重施故技 絕不可信

結果點？結果除咗NCA表明梁振英無喺英國違法、還咗梁振英一個清白外，英國金融行為監管局（FCA）和嚴重詐騙調查局（SFO）亦先後表明唔會有行動；換句話說，林、尹之前去英國講到UGL事件好大件事咁，結果反而係英國嘅執法機構還咗梁振英一個清白，佢哋而家去澳洲重施故技，用番相同招數，大家唔係仲信林卓廷呀？

老實講，梁振英同UGL簽訂離職協議，協議除咗各方知情外，梁振英得到當時戴德梁行董事局主席同意去協商協議，而且協議又律師所起草；如果真係有問題，相信唔同地方嘅執法機構一早做咗嘢啦！講到呢度，囍雨又係果句，林、尹眾籌炒作UGL事件，似「天仙局」多於一切！囍雨落筆時，林卓廷又喺臉書上載佢哋見澳洲律師之後既短片，話對方「提出了一些疑問，和要求我們進一步提供相關證據和文件」，咁其實即係又冇料到啦！

原圖：「天下為公」影片截圖