仲有唔夠一個月，就係立法會九龍西補選嘅投票日，除咗選舉初段前立法會議員馮檢基報名參選果時比較熱鬧之外，呢排選舉氣氛都相對淡靜；喺沉悶嘅選舉氣氛當中，廣男發現咗一單幾有趣嘅新聞，就係工黨李卓人繼早前被揭發宣傳車衝燈後，又畀人踢爆佢疑似喺行駛中嘅宣傳車打開車頂「捐」個頭出嚟嗌咪、懷疑違反交通規則，跟住又有人篤爆李卓人話佢嘅宣傳車停喺條街度阻住巴士前進。但如果報道屬實，無論係李卓人抑或係佢嘅競選團隊，守法意識好似差啲喎！

衝燈、阻礙交通 易釀成意外

如果係李卓人團隊違規掛下宣傳品，廣男覺得都唔係咩好大件事（不過都係犯法！），但李卓人團隊如果真係一而再、再而三咁違反交通規例，咁就真係唔講得笑喇！例如李卓人團隊宣傳車衝燈，如果咁啱有人過馬路，或者喺另一邊有車轉出嚟，咁會好容易出事架喎；而李卓人喺宣傳車「捐」個頭出嚟，萬一架車突然Dup停，廣男都怕李卓人會受傷；至於停架宣傳車阻塞到交通嘅問題，好明顯就係自私，李卓人團隊可能係想停架車喺有利位置「宣傳」，但條路唔係工黨，而係公家架嘛，若然有車睇唔到照過，係咪又有可能會撞車呢？

其實，喺畀人踢爆李卓人架宣傳車衝燈之後，李卓人都有公開道歉仲話會同涉事司機去自首，都算係肯承擔責任啦；而家再發生兩單疑似違反交通規例嘅案件，廣男又唔係好覺李卓人再有回應喎！當李卓人喺度批評其他候選人例如話陳凱欣「抄功課」嘅時候，佢或者佢團隊嘅人「一不離二、二不離三」咁涉嫌違法，係咪嚴重好多呢？廣男覺得李卓人應該出嚟交待下每一單疑似違法案件！

守法也不懂的候選人？

其實，選舉條例對選舉宣傳車、宣傳點樣貼、點樣用同安全都有仔細要求，唔係候選人或競選團隊想點就點！參選立法會但唔依法，如果當選，將來點樣為立法把關呢？難道攞住「民主牌」個招牌就大晒？搞違法佔領，係爭取民主，所以「冇錯」；宣誓玩嘢而違法，佢哋一樣覺得唔可以DQ佢哋！但大家諗一諗，其實盲反派都話要守護法治架嘛，如果有人一邊違法一邊又話要守護法治，你話係咪好矛盾呢？

現時立法會九龍西補選共有五名候選人，包括伍迪希、曾麗文、李卓人、馮檢基同陳凱欣。

原圖：Sze Tat Chau (神駒) Facebook、RTHK