有「長洲覆核王」之稱嘅郭卓堅，成日濫用法援制度，先後多次被法官批評佢嘅所作所為，真係睇到佢名都唔開心。不過咁，囍雨評論從來唔會因人廢言，郭卓堅早排申請司法覆核新界丁權問題，法庭都認為法律上有值得斟酌嘅地方，於是已經批出覆核許可，而法援署更加已經批出法援。郭卓堅以為今次實冇死啦，哈，點知又畀法援署發言佢隱瞞資產喎，於是就取消批出咗嘅法援；而最爆嘅係，法援署調查過程中發現郭卓堅個銀行戶口成日都有不明來歷嘅錢存入，成件事就即刻唔同晒喇，大家都會問，乜得嚟咁多錢使呀？

郭卓堅隱瞞資產證據確鑿

成件事係咁嘅，郭卓堅三年前入稟申請司法覆核，要求法庭下令政府取消新界丁權政策，佢本來已經獲得法援署批出法援，但署方後來發現郭卓堅銀行戶口不斷有資金進出，舊年開呢個戶口時已經即時存入四萬五千五百元，而喺一年內更錄得超過十次交易，每次都涉及約一萬元嘅存款或提款。

由於戶口狀況異常，法援署於是按程序要求郭卓堅解釋啦，佢就話啲錢係「洗碗、執紙皮、借錢」，而去到上訴聆訊時，佢又大改口風喎，話自己「嗜賭成性」，部分存款其實是賭馬彩金，屋企裡面亦存放咗五、六萬蚊流動資金畀佢賭博，而佢喺賽馬會更管有另一個存款戶口。由於認定郭卓堅係有意隱瞞資產，法援署最終決定撤銷其法援，郭卓堅唔服，向高等法院申請司法覆核法援署個決定，最終梗係畀人打回頭、拒絕接納佢個申請啦。

靠「生果金」為生 可以有幾萬蚊賭博？

講咁耐囍雨想帶出乜呢？其實好簡單，郭卓堅之前一直係申請綜援為生，成副身家理應唔可以超過三萬一千蚊港紙（綜援限制），雖然佢舊年十月為咗改領「生果金」而開立新銀行戶口，但大家唔好唔記得喎，法援署發現佢係「一開戶口」就存入四萬五千五百元，大家唔覺得件事好可疑咩？一唔申請綜援、冇咗資產限制，成副身家突然就超出綜援資產限制？真係好神奇囉。

仲有，郭卓堅自己亦承認，屋企裡面存放咗五、六萬蚊流動資金畀佢賭博，呢啲流動資金都係資產一部份，因乜事郭卓堅可以生活得咁豪，靠「生果金」為生（之前靠綜援為生，改領「生果金」相信佢經濟情況都唔會有大變動吖！）仍然可以留住五、六萬蚊去睹錢呢？唔明呀，真係唔明呀！

有責任交代資金來源

以前一直有人懷疑，成日申請司法覆核去阻撓政府施政嘅人，背後一定有股勢力資助佢，等佢可以「專心打官司」去搞政府；囍雨開頭都唔信架，而家睇到郭卓堅自己嘅供詞，真心有所懷疑囉。郭卓堅成日將「公義」掛喺口邊、包裝到自己好見義勇為咁，若然佢真係咁英雄嘅，唔該即時向社會交代清楚啲金錢來源，釋除疑慮都好吖嘛，點知你係唔係收錢幫人做嘢架！

原圖：Takungpao