「香港民族黨」畀政府以《社團條例》取締成為「非法社團」，「民族黨」日前向特首會同行政會議提出上訴，話保安局拒絕提供口頭解釋係「有違程序公義」等等，又鋪陳出唔同「理據」為自己「呼冤」，當中包括聲稱「民族黨」所有活動均是「和平、合法和非暴力」。廣男就認為，如果「民族黨」話自己有鼓吹暴力，但未真正用上暴力，或者仲講得通；但佢哋多次聲言要「武力建國」，如果仲想話自己係「和理非」，咁就有啲誤導成分喇！

要武力建國？

陳浩天曾經喺傳媒訪問入面聲稱自己無鼓吹暴力，亦從來冇涉及暴力，稱自己「十分和平」，但係根據警方文件，陳浩天唔止一次聲言要「武力建國」，包括話「即係對個政權呢，就應該要，即係用啲武力㗎嘞」、「若果要真係流血先至能夠得到自由嘅話，或者令到香港繼續保存落去嘅話，咁無辦法就要流血」以及「如果佢（政權）唔肯傾嘅，咪用下其他方法，可能要用拳頭或者用磚頭，再勁啲，咁打到佢肯傾為止」等等。呢啲叫「非暴力」，唔好玩我啦！

所以嚴格嚟講，陳浩天或者已經被取締嘅「民族黨」，唔係所有活動都係「非暴力」，而係佢哋有喺活動入面鼓吹暴力，只不過未將暴力主張實行起嚟、搞到有流血事件啫！大家千祈唔好以為講下啫，冇乜問題，陳浩天之前可以話用暴力，可能佢哋會搞「二次旺角暴動」都唔出奇，如果警方而家唔做嘢，等佢哋真係搞到有流血事件，恐怕已經太遲喇！

陳浩天有權上訴 但改變不了一國兩制事實

基於程序公義，廣男認同陳浩天絕對有權為「民族黨」上訴，但「民族黨」本身嘅要求係要「香港獨立」，而「香港獨立」肯肯定違反《基本法》，陳浩天向政府上訴，要求政府畀佢「攞正牌」顛覆政府，廣男就唔係好明呢個到底係咩邏輯嚟喇！仲有，到底陳浩天聲言要用武力、流血手段爭取訴求，當中又會唔會係違反咗香港其他法律呢？廣男認為非常值得研究！

原圖：Takungpao