立法會財委會主席陳健波日前接受訪問，提到政府喺《施政報告》裡面提出嘅「明日大嶼」願景；佢話喎，自己身為財委會主席，有責任控制審議時間，若然政府提交前期研究撥款申請，喺財務委員會會議程序已經修改嘅前提下，相信可以喺十幾個鐘裡面表決呢項撥款咁話。波哥呢番言論一出，隨即惹嚟盲反派代表猛烈批評，一時又話佢係政府「頭號打手」、一時又話佢「皇帝不急太監急」等等。到底盲反派所講係唔係事實，波哥又係唔係真係咁唔中立呢？

聽清楚波哥說甚麼

首先，囍雨覺得大家批評波哥之前，實在有責任聽清楚佢講緊乜。波哥原話係話，自從財務委員會會議程序修改後，財委會同以前已經完全唔一樣，相信政府若然就「明日大嶼」項目提出撥款申請，最多用十幾粒鐘就可以完成審議；波哥仲講到好白，話明自己日後都會「做醜人」，嚴格執行「新會議程序」，包括嚴格控制時間，不會容許議員重複提問，希望到時政府唔好「跪低」！

大家睇唔睇到波哥言論嘅重點？波哥前提係「嚴格執行新會議程序」，修訂後嘅財務委員會會議程序重點，就係要求財委會主席「嚴格控制時間，不會容許議員重複提問」，波哥作為財委會主席，佢只係講明一定會執行會議程序啫，請問一眾亂咁鬧人嘅盲反派議員，波哥何錯之有？即係佢哋希望波哥唔使跟住會議程序嚟做，可以想點就點、可以獨斷獨行呀？唔係咁風趣呀？

嚴格執行會議程序是責任

事實上，好多人聽到波哥「竟然」可以預計到財委會開會時間後，已經即時「起晒槓」，話佢「打矛波」、批評係「限制議員發言」等等；之但係咁，鬧波哥嘅人又有冇諗到，點解佢可以預計到時間先？係囉，咪就係因為財務委員會會議程序已經修訂咗，令到財委會會議可以更加有規有矩、杜絕有人鑽空子「玩拉布」，喺冇人可以「拉布」嘅情況下，以波哥咁深資歷，可以預計到會議時間又有咩問題？又有咩咁出奇？

講到尾，嗰啲有理冇理開炮鬧咗波哥先嘅反對派，本身就最值得檢討；好似嗰個民主派會議召集人毛孟靜咁，佢話喎，波哥作為主席應中立，批評對方係用權力做政府「頭號打手」，完全「過晒火位」，又話立法會監察政府同撥款功能被波哥「一鋪清袋」。波哥唔「中立」？唔肯執行會議程序、事事遷就晒你呢班「拉布怪」就真係唔「中立」喇！會議主席所謂嘅「中立」，並唔係「無為而治」，而係執行會議程序時「一視同仁」，枉毛孟靜你讀咁多書，好心唔好再貽笑大方啦！

原圖：Takungpao