《生果報》嘅公信力有幾高，唔駛囍雨講，大家都心中有數。最近「亂入」程度簡直嘆為觀止，之前囍雨睇佢啲報道同評論，見佢一時話全國政協副主席梁振英（下稱CY）係咁公開發表言論係想「回朝」，隔一排CY少啲發表公開評論就話CY咁靜有「陰謀」，囍雨已經覺得《生果報》好厲害，基本上講唔講嘢、講乜嘢都可以畀佢「亂入」。今日，囍雨喺《生果報》睇到一篇評論仲勁，竟然可以以CY屋企開花為理由，話CY「借花明志」，或象徵CY再度問鼎特首；咁樣嘅神邏輯，真係令人好亂囉！

《生果報》借「花」攻訐

《生果報》呢篇題為《梁振英菊開二度》、由馮睎乾撰寫嘅文章，大意就係話CY連續喺Facebook開幾個Post都係講自己屋企點開花或者分享有關開花嘅新聞，得出「梁先生是中國人，大概相信此乃吉兆，亦趁機借花明志」、「難道是象徵他可再度問鼎特首？」等結論；一句講晒，就係又想話CY想「回朝」做特首，追住CY嚟攻！

在建制派內挑動矛盾

其實熟悉CY嘅人都知佢鍾意種花務農，唔少朋友都收過佢送嘅種子、花同農作物，喺Facebook出12個Post，又咩大不了？當《生果報》以至部份盲反派人士係咁「吹」CY想「回朝」嘅時候，其實背後搞緊啲咩， 真係好值得研究下！大家諗下，《生果報》借住類似嘅報道、評論或者政情文章，可以挑撥到盲反派支持者嘅情緒之餘，分分鐘仲可以喺建制派之間挑動矛盾，幾篇文章對於佢哋嚟講基本上又無乜成本，《生果報》當然樂此不疲啦！

以為係咁「吹」CY回朝剩係挑動矛盾咁簡單？囍雨就覺得《生果報》嘅用心再毒都有；好簡單，無論係佢哋反對嘅港珠澳大橋，抑或係佢哋好鍾意炒作嘅「港獨」議題都好，《生果報》喺攻訐CY嘅同時，其實都可以為咗反對港珠澳大橋、撐「港獨」等議題造勢。尤其甚者，CY喺反「港獨」方面咁敢言，《生果報》如果攻訐佢多啲「成功」令佢講少啲嘅話，對佢哋嘅「反中」事業可謂大有裨益。

CY從未評論政府政策

《生果報》等係咁「吹」CY想回朝，但囍雨睇番CY近幾個月嘅言論，基本上都係為反「港獨」，推銷「一帶一路」、「大灣區」同「改革開放40年」，為政治議題或者國家事務發聲，從未就現屆特區政府嘅政策或表現指指點點；《生果報》呢個CY想「回朝」嘅講法除咗「水份」重之外，似乎連實情都未掌握好！至於《生果報》係咪想借散播呢啲咁嘅謠言，去引起現屆政府猜疑CY，或挑起建制派內部嘅不信任，甚或引起北京關注，聰明嘅讀者，相信大家應該心中有數！

原圖：《港人講地》圖片