民主黨立法會議員許智峯（癲鴿峯），因為涉嫌喺今年四月喺立法會強搶女政府人員手機，事後被控〈普通襲擊〉、〈有犯罪或不誠實意圖而取用電腦〉以及〈阻礙公職人員執行職務〉三項罪，案件日前已經提堂，一向死不認罪嘅癲鴿峯當然唔認罪，仲喺法庭外口口聲聲話件事嘅緣起唔係因為佢搶手機，而係「政府多年違法派『狗仔隊』干預議會運作」云云。癲鴿峯搶人手機唔認罪唔緊要，一切留畀法院去審囉，但佢而家直頭係屈返政府轉頭，民主黨嘅議員，確實家門不幸。

認攞手機 但唔認罪？

任何疑犯除非畀法庭宣判佢有罪，否則基本上都應該假定呢個疑犯係無辜嘅；所以癲鴿峯唔認罪、要抗辯，呢一點囍雨唔會批評，最多都只會覺得奇怪，一個人喺傳媒面前承認自己未得同意「擅自取去」他人手機，又向公眾鞠躬道歉，但被人告果時又唔認罪喎，確實有趣！到底「取去」或者「不問自取」係咪搶，或者同搶有咩分別呢？呢一點囍雨相信法官會好好處理，大家就睇下癲鴿峯最後會唔會被定罪啦！

政府派員到立會 並無違法

至於癲鴿峯話政府「多年嚟違法」，囍雨就有必要喺度講清楚呢點啦；佢話喎，政府「非法」干預議會運作、影響議員投票等等，但囍雨清楚記得私隱專員黃繼兒早排都回應過，政府派人去立法會做嘢根本冇犯法，因為有關職務涉及重大嘅公眾利益，而議員身處嘅立法會又唔屬於私隱期望高嘅地方，收集資料地點更加喺公眾地方位置，唔係咩敏感個人資料。即係話，政府派人到立法會做嘢絕對冇犯法，癲鴿峯到今日仲喺度屈政府！

好老實講，癲鴿峯咁高調而且重複地話政府違法或者干預議會運作，講到尾佢都係想轉移佢自己涉嫌違法嘅視線；囍雨就喺度諗，如果佢到今日仲係咁話政府侵犯私隱或者犯法，咁佢當初又做乜要向事主、即係果個女政府人員道歉呢？唔通所謂道歉只係平息眾怒嘅權宜之計，而家事過境遷佢就再反面話番人轉頭？癲鴿峯最後有冇罪仲係未知之數，但佢無品，囍雨就肯定係真嘅！

原圖：wenweipo