仲有大概一個月就係立法會九龍西補選嘅投票日，噚日有電子媒體搞咗場選舉論壇，好唔好睇就見仁見智啦，至少幾位候選人有機會唇槍舌劍，畀選民認識佢哋都係好嘅。囍雨當然唔喺現場，但根據唔同嘅新聞報道就得出一個結論，就係與其話呢場選舉係建制與非建制嘅對決，不如話今次選舉係政治派同民生派嘅對決；其中工黨李卓人就擺明較側重政治嘢，而另一候選人、食衛局前政治助理就明顯較關心民生議題，尤其係醫療福利等等。

李卓人炒作政治　陳凱欣專攻醫療

近期有關FCC（香港外國記者會）同佢副主席馬凱簽證不獲續期嘅新聞鬧得熱哄哄，當然會成為選舉論壇一大話題啦；當陳凱欣話「新聞係要有足夠事實根據」，基於入境處資料，唔足以指「新聞自由收窄」後；對手李卓人隨即批評陳凱欣「奸到出汁」，話新聞界都認為馬凱事件關乎新聞自由，仲攞埋浸大傳理學院嘅院訓嚟「揶揄」陳凱欣。好明顯，李卓人係想借住將唔同事件政治化，嚟幫自己「吸票」。但事實係點呢？件事真係涉及言論自由？點解馬凱身為傳媒工作者，但係不務正業為「港獨」份子搭建「宣獨」平台仍然可以叫做「新聞自由」呢？呢一點，李卓人係解釋唔到嘅。

另一個有趣嘅地方係，李卓人論壇期間多次明示暗示陳凱欣喺做政治助理嘅時候「不作為」，但當陳凱欣除咗講到自己喺政府工作嘅時候做過啲咩項目、幫過咩病人之外，仲問番李卓人知唔知九龍西有幾多間醫院，同埋知唔知醫療券每人有幾錢；李卓人一係就支支吾吾，一係就答錯，似乎呢個要喺九龍西參選嘅人，連區內基礎設施同民生嘢都唔係好熟咁喎！

政治與民生的對決

所以呢，囍雨就覺得呢場選舉（估計勝算較高嘅係李卓人或陳凱欣），根本就係一場政治派與民生派嘅對決。李卓人從政咁多年，炒作政治議題一向係佢強項，今次佢反DQ、反東大嶼山填海，會唔會成功仲係未知之數；至於陳凱欣，由於佢過去喺政府都係做醫療服務等相關工作，所以佢今次參選亦順理成章將市民健康、醫療福利等作主打。作為精明選民，大家會揀政治派、民生派抑或其他候選人例如「永不言休」嘅馮檢基呢？

現時立法會九龍西補選共有五名候選人，包括伍迪希、曾麗文、李卓人、馮檢基同陳凱欣。

原圖：RTHK