選舉管理委員會噚日舉行立法會九龍西補選嘅候選人簡介會，候選人之一嘅工黨李卓人同埋被DQ嘅劉小麗等人就去到現場抗議同叫囂，擾亂簡介會秩序，結果被多名保安驅逐離場。囍雨覺得，劉小麗被DQ已成定局，而且係因為佢要搞違《基本法》嘅「自決」而被DQ，可以話係咎由自取；至於李卓人同埋佢一齊去搞事，擺明就係想引人注意，唔通工黨同身為老牌政客嘅李卓人真係淪落到要靠呢啲手法去宣傳？

李卓人都要「衝」

如果只係得劉小麗等一班後生仔玩搗亂，囍雨都覺得唔出奇，因為呢班人一向都係靠激進形象博出位，否則劉小麗喺前年就唔會因為宣誓玩嘢而被DQ；但奇怪嘅係，李卓人呢啲較為「老派」嘅反對派人士，以前畀人印象都係比較溫和，至少唔會亂咁撞、亂咁衝，李卓人從政幾十年而家先嚟做激進派，囍雨真係想問下「人哥」，點解變成咁激進，莫非要吸納埋九龍西啲激進派支持者嘅選票先？

最大鑊嘅係，無論係李卓人本人抑或劉小麗等人，呢班人喺咁正經嘅候選人簡介會都搞事，令人聯想到他日真係入咗立法會，會唔會「一言不合」就玩搗亂、衝擊議會呢？囍雨覺得係後者嘅機會大啲囉！

衝突代替討論 選舉勢失焦

到目前為止，基本上囍雨喺呢場選舉仲未見到有咩建設性嘅討論，近期有關另一候選人陳凱欣而較受注意嘅新聞，似乎就係佢落區時被「人民力量」譚得志（人稱「快必」）喺街度謾罵同追擊；至於馮檢基嘅呢，基本上都係佢同其他盲反派「互插」、「籠裡雞作反」嘅新聞。至於李卓人，除咗反DQ同噚日喺簡介會搗亂之外，基本上都唔係好知佢喺呢場選舉做過乜。一場主打「互相攻擊」、狙擊、謾罵嘅選戰，係咪要選民揀一個「最抽得」（最好打）嘅做議員呢？咁民生、地區事務問題冇乜人理，呢場選舉實失焦架喎！

囍雨喺度奉勸咁多位候選人，尤其係最愛「搗亂」嘅盲反派代表，不如認認真真同其他候選人比下理念、政綱、能力、經驗啦；你哋想贏，都要話畀人知，你哋係做實事，唔係剩係識得搞事、唔係剩係識「拉布」架嘛！

現時立法會九龍西補選共有五名候選人，包括伍迪希、曾麗文、李卓人、馮檢基同陳凱欣。 

原圖：原圖：Takungpao