全球幫人都翹首以待嘅超級工程港珠澳大橋今日正式通車。喺呢個大喜日子，一向以「盲反中」見稱嘅盲反派當然扭盡六?想唱衰大橋啦；不過口裡說不，身體卻很誠實，近日就有人影到，嗰件專門挑撥兩地矛盾嘅「新民主同盟」范國威好型咁喺港珠澳大橋影相，而已全程笑到四萬咁口；跟住就有傳媒報道，「新民主同盟」啲議員都成日搞內地旅行團，由西安、華山、潮州以至中山等都有。呢啲世界仔咪「醒目」囉，一邊鬧內地，一邊又帶居民番內地玩，政治上攞Credit，又帶市民去玩攞選票，可憐跟佢哋去衝啲班，而家咪乜都冇囉！

范國威事後補鑊

范國威畀網民笑完佢喺港珠澳大橋表現得好興奮、睇落同大灣區非常融合，范國威隔咗一陣就喺Facebook「澄清」，質疑點解大橋冇繁體字，聲稱自己去大橋係「監察」政府，唔好屈佢支持大灣區喎，仲叫貼出有關圖片嘅政黨成熟啲等等。

嗱，大家姑且當范國威真係笑笑口咁去港珠澳大橋「監察」；但問題仍然未解答到，就係點解范國威甚至成個「新民主同盟」成日反大灣區甚至反內地嘅，但又成日帶人去內地玩呢？即係平時喺電視做就要做騷Sell本土、反內地人，但面對區內嘅街坊，就要帶佢哋去內地，等大家認識國情？

最屈機的政客

所以話呢，盲反派啲議員永遠都係咁屈機，當對住廣大市民，為咗「維持」佢哋本土優先、反內地印象，就有關內地嘅都要盲反一餐；去到自己選區，就投自己選民所好，連自己平時反開內地都好似唔記得咁。范國威一張喺港珠澳大橋笑容燦爛嘅相，好似冇乜特別咁，但意味深長，將呢位政客「抽水唔抹嘴」嘅特點表露無遺。

廣男從好嗰方面去諗，會唔會范國威其實係見到國家、香港咁宏大嘅利民工程完成咗，身為中國香港立法會議員嘅佢都禁不住內心嘅興奮，但礙於自己盲反派議員身份，所以之後都要話自己係去「監察」，而唔係支持大灣區呢？范國威，唔使怕醜喎，咪認咗佢囉。

原圖：范國威Facebook