民主黨立法會議員許智峯（由於佢一言一行太瘋癲，下稱佢為「癲鴿峯」）因為喺立法會公然搶女政府人員手機，早前被警方正式落案起訴；但一波未平，一波又起，有傳媒就揭發，「癲鴿峯」位於筲箕灣嘅議員辦事處，喺招牌度加咗兩個唔係議員嘅「社區顧問」名字，涉嫌違反房委會公屋嘅議辦只可租予立法議員、區議員嘅嘅規定，有人仲爆料話「癲鴿峯」收到投訴後仲「撻朵」話自己係立法會議員而不予理會。囍雨就諗，如果傳媒報道屬實，許智峯咪即係擺明違規仲要無視投訴，名副其實「無法無天」！

公屋議辦 只可租予議員

據報，「癲鴿峯」位於筲箕灣愛東邨嘅議員辦事處，喺8月嘅時候被發現喺議辦招牌上加咗民主黨東區區議員張國昌、趙家賢同「社區顧問」李建賢、蘇逸恒嘅名，但查實公屋議員辦事處嘅租約本身係講明唔可以畀其他人張貼海報、陳設招牌或者從事其他業務等等；即係話，「癲鴿峯」畀唔屬於議員嘅其他人掛招牌、做宣傳，好可能已經違反租約。

有其他睇唔過眼嘅區議員接受訪問時就話，趙定賢同張國昌據知已經加咗喺租約入面成為承租人，加佢兩個名就冇問題，但另外兩個「社區顧問」由於本身唔係議員，根本冇可能加喺租約入面，故此幾乎肯定係違反租約。呢名區議員仲話，雖然已經就事件向房署同東區區議會投訴，但有關方面回覆，指「癲鴿峯」就諸多推搪，話自己唔係違約，仲話自己係立法會議員，疑似想恐嚇政府人員收聲。咁都得？唔通「癲鴿峯」真係覺得自己做咗立法會議員就大晒？

許智峯真係法律系畢業生？

之前因為喺立法會「搶嘢」、睇人手機私隱單嘢，囍雨已經非常懷疑，到底「癲鴿峯」係咪真係本港大學法律系嘅畢業生。明知搶嘢係犯法，佢都夠膽死公然喺立法會當眾搶手機；仲有，「癲鴿峯」除咗搶手機外，以往仲被人揭發過疑似偷電、涉嫌違泊，以及涉嫌推撞其他區議員。家陣傳媒又揭發佢連個議員辦事處招牌都可能係違規，大家真係要問「癲鴿峯」一句，你係唔係以為自己大晒？

「癲鴿峯」劣跡斑斑，當然需要譴責，但大家唔好忘記一點，就係「癲鴿峯」同佢所屬嘅民主黨其實一樣係咁不堪。民主黨之前話會嚴正調查「癲鴿峯」搶手機單嘢，而家咪又係冇晒下文。到今日都仲縱容「癲鴿峯」，係咪想話畀人聽所謂「和平、理性、非暴力」，根本全部都係呃人嘅大話先？

原圖：RTHK