「自決派」黃之鋒，近日喺美國《時代雜誌》撰文，除咗一如既往曲解《中英聯合聲明》同唱衰香港，佢仲好似炒雜燴咁將唔同新鮮熱辣嘅時事問題加落篇文章度，疑似想營造「香港好亂」嘅感覺。由於內容太多失實之處，故此囍雨作為「時事愛好者」亦不得不寫返篇文回應一下呢個「有為青年」。無時無刻都想外國政權介入香港事務，腦海中成日想將香港變為獨立政治實體，黃之鋒仲到底仲有冇是非黑白觀念架？

黃之鋒曲解《中英聯合聲明》

黃之鋒喺《時代雜誌》篇文題為〈為何世界應對港府驅逐外國記者感擔憂〉（Why the World Should Be Alarmed at Hong Kong's Expulsion of a Foreign Journalist），文中首先提到疑似因為幫「港獨」份子陳浩天搭建「宣獨」平台，因而不獲特區政府續批工作簽證嘅香港外國記者會（FCC）領導層馬凱，繼而再將馬凱同先後被選舉主任依法取消參選資格、同屬「自決派」嘅香港眾志成員周庭同工黨劉小麗拉埋嚟講，話佢哋幾個從未參與爭取香港獨立，批評特區政府咁做已經違反《中英聯合聲明》云云，促請英國首相文翠珊向北京當局追究責任，又並期望美國維護普世價值，經濟制裁打壓香港自由嘅官員。

違反《中英聯合聲明》？黃之鋒係真唔識定假唔識呀？中國政府喺《中英聯合聲明》裡面嘅承諾，全部都已經透過《基本法》履行同落實，假設馬凱真係因為協助陳浩天「宣獨」而不獲續批工作簽證，咁佢同周庭、劉小麗三個，好明顯就係因為行為同主張不同程度咁違反《基本法》，特區政府先會根據相應法例去處理！乜黃之鋒將啲嘢調轉晒嚟講都得架？

維護《基本法》就是履行《中英聯合聲明》

「港獨」違反《基本法》，呢點相信冇人會有異議，而身為香港眾志要員嘅黃之鋒亦應該知道，所謂「政治自決」，即係香港眾志最擁抱嗰套信念呢，其實同樣係違反《基本法》規定，故此嚴格嚟講，按法例DQ周庭同劉小麗正正等同履行緊《中英聯合聲明》！乜話，黃之鋒唔認同？嗱，唔好講咁多，黃之鋒呢一刻就公開答，「自決派」主張嘅「自決」，係唔係代表香港可以單方面改變政治現狀，即係包括「港獨」、「歸英」等等？答吖，你敢唔敢答吖？

至於馬凱，情況就更簡單直接。馬凱本身係外國人、唔係香港永久性居民，佢喺香港逗留同工作，一定要得到特區政府入境處批准；雖然係外國人，但所謂「入境問禁」，想留喺香港嘅就一定要守包括《基本法》在內嘅所有法律，呢一點，相信黃之鋒冇理由反對吖？正因為咁，馬凱同FCC不聽勸告，堅持為「港獨」份子搭建宣傳平台，明知故犯參與不折不扣違反《基本法》嘅行為，不獲續批工作簽證又有幾出奇？

「自決派」應受唾棄

黃之鋒連《中英聯合聲明》嘅內容都唔掌握，咁就走去為外國雜誌撰文「唱衰香港」，呢啲咁惡質嘅行為真係令人握腕。「自決派」嘅信念，用八個字講晒：奇技淫巧、邪道歪說，只識乞求外國干預香港事務，反而一直拒絕行正路、否定「香港人走出香港政改路」嘅可行性，香港政制未能前進，正正係拜呢班人所賜。香港市民要唾棄嘅，唔該認清對象，徹底咁唾棄以黃之鋒為首嘅「自決派」啦！

原圖：Takungpao