好開心呀！好興奮呀！囍雨因咩事咁開心呀？因為「天地有正氣」囉！鬧人「唔君子」嗰個「偽君子」民主黨立法會議員許智峯呢，今日終於被警察正式檢控搶女性政府職員部手機，先唔理告唔告得入都好，呢個已經係向公義邁進一大步啦！雖然證據確鑿，亦受到社會上下強烈譴責，不過許智峯呢隻「癲鴿」仍然死不悔改，係都要話政府派員紀錄立法會議員出入會議廳、計算會議法定人數等等係屬於「干預議會」，「癲鴿峯」呀，你份人唔好咁無賴得唔得呀？

「狗仔隊」行動光明正大

講到「癲鴿峯」搶手機呢單嘢，一定不得不提政府俗稱「狗仔隊」嘅職員。好喇，到底「狗仔隊」係做乜架呢？綜合政務司司長張建宗同傳媒報道講內容，「狗仔隊」就係喺開會嘅時候留守喺立法會各會議室門口，各人配備一部專用智能電話同對講機，當有議員離開會議廳嘅時候，喺門外守候嘅「狗仔隊」成員就會即時通報，方便政府估算係唔係需要要通知其他議員返去會議場地「補位」，以防流會。

問題嚟喇，紀錄議員出出入入，目的只係呼籲議員返會議地面避免流會啫，到底有咩咁侵犯議員「私隱」？而且又有幾「干預議會」呢？政府派員喺會議場地門口守候，防止出現流會，其實亦係盡咗守護公帑嘅責任，況且講到尾都係想會議繼續進行啫，到底有咩錯呢？以「癲鴿峯」為首嘅一班盲反派議員，為乜又咁介意人哋知道你走咗出去唔開會呢？

「癲鴿峯」沒必要用暴力

除咗話政府「干預議會」外，「癲鴿峯」又話喎，自己咁做「只為公義，不為個人」，又話「面對政府種種打壓，我們更要有尊嚴、有鬥志走下去」，睇落就好似慷慨激昂，但大家諗深一層，到底「癲鴿峯」有乜需要出手搶「狗仔隊」部手機呢？大家記住喎，涉事嘅政府職員只係紀錄議員出入會議場地，對住你班盲反派惡棍，諗都諗到唔會玩跟蹤、唔會騷擾、唔會阻撓啦，試問人哋何曾「打壓」你，搞到你要出手用暴力去搶手機呀？

若然「癲鴿峯」解釋唔到上述問題的話，唔該就唔好講到咁大義凜然喇，擺明就係你個人情緒失控，做出人神共憤嘅喪德敗行，事後仲要「死雞撐飯蓋」諉過於人啦！呢隻咁嘅「癲鴿峯」，本身同時係區議員，但就已經先後多次被人揭發涉嫌違泊、偷電、推撞其他區議會同事，啲衰嘢多到十隻手指數唔晒，而家仲好意思扮英雄？行為啦，唔該！

原圖：Wenweipo