支持「自決」呢種違法《基本法》主張嘅工黨劉小麗，喺上星期五被選舉主任DQ，所謂嘅「Plan B」李卓人立刻出動，四圍爭取支持。囍雨留意到，成日將「公平、公義、公正」等等名詞放喺口邊嘅《生果報》，即時非常積極咁為李卓人鳴鑼開道，甚至喺頭版以〈千人集會反DQ 籲補選票投李卓人〉為題間接幫李卓人「造勢」。囍雨真係有啲懷疑，《生果報》偏幫李卓人偏幫得咁明顯，乜真係配得上「公平、公義、公正」呢幾個字咩？乜真係冇違反到選管會嘅指引咩？

頭條標題籲票投李卓人

李卓人作為盲反派元老、而家喺冇經初選之下被推舉代表盲反派參選，基本上除咗盲反派班大哥大姐之外，盲反派喉舌媒體「全力支持」李卓人當然就唔出奇啦；之但係咁喎，當囍雨見到《生果報》題為〈千人集會反DQ 籲補選票投李卓人〉嘅報道就覺得好大問題喇， 始終《生果報》都係一個傳統新聞媒體，大大隻字借集會人士為名，疑似呼籲票投畀某個參選人，會唔會太過偏埋一邊，唔係好符合傳媒報道選舉新聞時嘅公平原則呢？

單單一日嘅新聞報道，當然未必足以斷定《生果報》「好唔公平」，因為《生果報》喺噚日嘅報道都有一條係講馮檢基；但當囍雨睇埋今日《生果報》嘅報道，啲疑問又出番嚟啦，噚日有人發起遊行反對東大嶼山填海，《生果報》又專登出一條新聞，題為「李卓人籲用選票守住庫房」。既然《生果報》要就住一個政策、社會事件訪問立法會補選參選人或者候選人，係咪應該唔只問李卓人一個呢？凡此種種，《生果報》畀到囍雨嘅感覺，就係幫劉小麗、李卓人賣廣告！

媒體可以有立場 《生果》明顯太過份

可能有啲人會話，唔同媒體有唔同立場好合理；囍雨認同，任何媒體都可以有立場，絕對唔可能完全中立，但有立場還有立場，搞到好似《生果報》咁就明顯過晒底線。嗰個所謂「反DQ集會」都唔同你計，尋日遊行嗰個明明係公共議題，公共議題就好明顯需要問晒咁多個候選人立場先至公平吖，李卓人都未當選，咁通佢嘅意見會特別珍貴？讀者真係冇需要知道其他候選人就住同一公共議題嘅立場？點講都唔通啦，《生果報》！

開口埋口就話「公平、公義、公正」，去到選舉就只係支持、報道、追捧自己支持嗰個候選人，呢個咪就係《生果報》虛偽之處囉。「偽君子」之所以比「真小人」更可怕，全因為「偽君子」表裡不一，永遠「講一套、做一套」，令人無從捉摸，隨時畀佢跣一鑊都唔知！跣完仲唔止，仲要扮好心去噓寒問暖，甚至仲將跣你嘅責任推返落你身上，真係聽到都心寒呀。睇完囍雨上述舉出嘅例子，到底邊個係今日香港傳媒偽君子呢？大家一定知道答案嘅。

除李卓人外，食物及衛生局前政治助理陳凱欣同前立法會議員馮檢基已獲確認為立法會九龍西補選候選人，另外沙田區議員陳國強及曾參加年初港島區立法會補選的伍迪希亦已於今日報名參選。

原圖：Takungpao