行為取態言論一向極之挑釁同充滿攻擊性嘅民主黨立法會議員許智峯，尋日喺立法會特首答問會上批評特首林鄭月娥，喺處理香港外國記者會副主席馬凱不獲續發工作簽證一事上手法「不君子」，結果被林太反串佢，話若然提到「君子」，起碼要求係「動口不動手」。林太呢句說話，擺明就係諷刺許智峯之前「強搶政府人員手機」呢件事啦，結果引來哄堂大笑、掌聲連連。聽落就幾好笑，不過查實都幾悲，身為立法會議員竟然厚顏無恥到咁，佢出公帑糧架，仲唔係香港人悲哀？

許智峯惡行「罄竹難書」

許智峯呢隻「癲鴿」所做嘅衰嘢，文雅啲講係「罄竹難書」，老土啲講係「成本電話簿咁厚」。串佢強搶女性公務員手機已經嫌太舊，就冇幾耐之前之嘛，身為中西區區議員嘅佢出席區議會財務委員會時，竟然夠膽死用手夾硬撳住委員會主席李志恆枝咪，阻礙會議進行之餘，仲有打壓李志恆言論自由之嫌；仲有喎，佢喺個會議上玩到冇嘢好玩，竟然疑似特登撞開原本坐喺度嘅區議會副主席陳學鋒，事後拒絕道歉之餘，仲要用充滿挑釁味道嘅眼神「睥」實陳學鋒。乜嘢叫「不君子」？許智峯呢啲行為咪就係叫做「不君子」囉！

當然啦，要指控許智峯「不君子」，甚至話呢個人形物體係「真小人」，罪狀當然就唔可以只得一單咁少。堂堂立法會議員，乜都唔使做就起碼伕每月淨袋九萬六千蚊公帑，咁都經已夠晒爽皮啦，點知擁有一部價值四十萬電動車嘅佢，竟然仲要衰到疑似學人「偷電」，喺未得管理人員准許下，擅自喺屬政府所有嘅堅尼地城停車場裡面「叉電」。呢類涉嫌盜竊嘅行為，點睇都唔係「君子」啦，係唔係呀許智峯？

「不君子」行為多不勝數

仲有仲有，早排有市民因為不滿佢強搶女政府人員手機，去到許智峯嘅議員辦事處到示威同遞交請願信，呢啲咁和平理性，而且合乎民主原則嘅示威活動，許智峯竟然置之不理，仲縱容下屬當場撕毀示威者嘅請願信。呢啲咁無賴嘅行為，日日夜夜都畀你許智峯問候嘅政府官員一定唔會做，成個政壇真係只有「真小人」先做到出架咋，許智峯仲好意思鬧人「不君子」？行開啦你！

當眾撕毀和平示威者請願信、喺中環機利文街涉嫌違例泊車、涉嫌偷電、搶人手機、打壓其他區議員言論自由、涉嫌暴力推撞其他區議會成員，許智峯啲衰嘢多到冇人有，到底仲啲乜犯法、無品嘢係做唔出嘅呢？「君子動口不動手」，許智峯次次做衰嘢都係「手口並用」，呢啲品格咁低下嘅人，連有冇資格做「人」都成疑問啦，香港市民真係仲要選佢做議員？

原圖：Wenweipo