廣男噚日睇到篇由《生果報》李怡所寫嘅奇文，撇除啲一味靠估無乜說服力嘅內容，篇文意思大概係鬧特首林鄭月娥強調香港無「大陸化」，咁已經反證佢哋係推行緊「大陸化」得嚟又要掩蓋，完美演繹乜嘢叫做「屈得就屈」嘅「神邏輯」。點知今日睇《生果報》，又見到篇類似邏輯嘅報道喎，話全國政協副主席梁振英近排對政治議題冇乜發聲，話事件「相當奇怪」。其實，奇怪嘅應該係《生果報》先啱，人哋講政治嘢又鬧，唔講政治嘢又畀你哋話「古怪」，咁即係點都要畀《生果報》鬧啦，咁仲唔係擺明玩針對？

龍門任搬 乜都可以鬧

《生果報》今日話喎，梁振英個Facebook已經唔似佢Facebook，因為梁振英之前喺Facebook就「香港民族黨」（已被取締的非法社團）、FCC（香港外國記者會），以及民主黨立法會議員林卓廷不斷炒作嘅UGL事件發聲，之後亦有就FCC租約、高鐵甚至黃毓民掟杯案等講嘢，但近期就冇乜講政治，啲發帖都係講改革開放、「一帶一路」等等；而由於FCC副主席馬凱事件搞到滿城風雨，但梁振英至今都冇出聲，所以《生果報》得出一個結論，就係「相當古怪」。

老實講，廣男覺得「相當古怪」嘅係《生果報》果種「多角度」攻訐報道手法就真！當梁振英果敢地就唔同政治議題發聲，《生果報》就質疑人「另有所圖」，到近排梁振英冇發表意見喇，《生果報》就話人唔講嘢「相當古怪」。喺呢度廣男真係要請教一下《生果報》，到底喺香港從政或者擔任公職嘅人，係「應該」講，定「唔應該」講呢？而家情況下，講又鬧，唔講又鬧；講得多又鬧，講得少都要鬧，即係乜都要鬧，《生果報》「多角度」狙擊政見不同者嘅「功力」，廣男真係佩服得五體投地。

《生果報》報道貶低「一帶一路」 相當古怪

不過咁，《生果報》欠缺傳媒操守、報格卑劣、講一套做一套亦都已經唔係今日嘅事喇，之前就已經有人踢爆，《壹傳媒》（《生果報》母公司）喺業績報告度寫住「『一帶一路』倡議重新整頓服務及消費行業經濟，為傳媒行業掀開全新機遇。本集團已在各方面準備就緒，務求以一系列創新產品和服務抓住該等機遇」；明明《生果報》母公司都話要把握「一帶一路」機遇，但佢哋嘅報道處處針對特區政府、中央，甚至積極唱衰「一帶一路」，報道取向同集團業績報告內容各走極端，到底係業績報告內容誤導股東吖，定係《生果報》整個編採部門都「相當古怪」所致呢？ 

原圖：《蘋果日報》截圖