特首林鄭月娥今日喺立法會發表任內第二份《施政報告》，事前一早已經有消息傳出，會就各項爭議作出「決定性處理」；理論上，特首要宣布一份關乎香港未來嘅報告，全體立法會議員都應該留喺議會細心聽下特首講啲乜，有啲咩佢哋需要為香港或者佢哋嘅選民留意，但偏偏有幾個盲反派議員，喺林鄭月娥入場嘅時候就喺度不斷叫囂，立法會主席梁君彥別無他法，被迫趕咗呢幾個人離場，而另外相當大部份就自己離場疑似想抗議。廣男覺得，啲議員每個月攞超過十萬蚊薪津，但喺呢類關乎香港未來嘅會議／場合就只識玩嘢，呢十幾萬又真係「幾易拎」喎！

又政治化馬凱事件

今朝林鄭月娥踏入會議廳，一班盲反派議員就高舉「捍衛新聞自由」、「停止打壓記者」等口號，立法會主席梁君彥多次點名要求佢哋安靜但無效，結果毛孟靜、陳志全、區諾軒同朱凱迪被逐離會議廳，而另外相當一部份相對溫和嘅就自行離場抗議。換句話說，即係呢班議員「一開工」，就自己「製造機會」收工。

對於英國記者馬凱簽證不獲續期，廣男都係要不厭其煩地講多次，到呢一刻亦冇人知道馬凱點解不獲續發工作簽證，但若然馬凱真係好似坊間所講咁，係因為由佢領導嘅香港外國記者會（FCC）幫「港獨」份子宣傳，而令到特區政府拒續發工作簽證，咁件事就絕對唔涉及馬凱本人嘅新聞工作，換而言之亦唔涉及新聞自由！盲反派借事件炒作本身已經有問題，而佢哋借馬凱一事喺立法會搞事，變相令自己唔駛開會，就更加唔應該！

立法會議員嘅職責，就係出席會議，聽政府官員等講解政策，代表佢哋嘅選民甚至全香港作出提問、修訂以至投票。而家毛孟靜等人一開會就「開波」，搞到自己畀人逐出會議廳唔駛開會，佢哋根本連議員基本責任都冇做好；將心比己，當其他普通市民都會非常留意《施政報告》對自己有乜影響嘅時候，一班盲反派議員竟然喺會議廳連聽都唔聽就走咗去，我哋係咪需要呢啲議員呢？

議會亂象 還須糾正

特首發表《施政報告》，只係推行當中一系列措施嘅開始，之後立法會要討論、審批各項措施嘅時候，相信先至係「真正戰場」；前排有建制派議員建議再修改《議事規則》，進一步規管喺議事廳「搞事」嘅議員，廣男舉腳贊成，因為議會唔能夠正常運作，最後受影響嘅，始終都係香港市民！

原圖：RTHK