立法會九龍西補選提名期開始咗幾日就已經「滿地花生」，最「花生」嘅地方唔係盲反派同其他政治陣營嘅對決，而係盲反派係咁用唔同方法屈「基」，將已經報名參選嘅馮檢基砌到「不似人形」；前幾日先有親盲反派媒體將馮檢基「形容」為親左派人士又講到佢收好多著數咁（事實係內容空洞），今日囍雨睇報紙，就睇到馮檢基去廉署舉報，話有人造謠抹黑佢，講到明明已經結婚多年兼有個仔女嘅馮檢基好似同性戀咁，認真瘋狂。囍雨諗，唔理屈也好、硬砌也好，講到異性戀傾向明顯嘅馮檢基係「基」咁，會唔會「吹」得大咗同過份咗呢？

馮檢基跟男性「拍拖」？

據傳媒報道，馮檢基噚日去廉政公署舉報，話民主動力前召集人鄭宇碩、網台主持「索羅B」同將軍澳民生關注組成員柯耀林喺網台節目意圖造謠抹黑佢，涉嫌違反《選舉（舞弊及非法行為）條例》；馮檢基仲引述「索羅B」喺網台話佢同前特首董建華特別顧問葉國華「拍拖夜遊黃浦江」，馮檢基就話大家好清楚佢性傾向，澄清自己係基督徒，而且係結咗婚兼有一仔一女，認為有人話佢係同性戀，係想基督教朋友、選民唔再支持佢咁話。

對於馮檢基嘅控訴，柯耀林就回覆傳媒，話個網台節目話馮檢基同其他人「拍拖」，只係兩個人一同出行，無意圖話馮檢基係同性戀。其餘話馮檢基收葉國華錢果啲馮檢基已經澄清咗囍雨就唔多講喇，但盲反派最開頭話馮檢基「?票」，之後就想話佢係親左派、收人錢，而家更進一步，有人好似想話馮檢基係「收錢兼同性戀」咁，會唔會Over咗少少呢？

過份攻擊 適得其反

馮檢基點睇同性戀係一件事， 囍雨並唔係想批評佢對或錯，而係想帶出，人哋唔係你講到佢係、好似係，呢個行為本身已經好唔道德，加上係喺選舉期間出現，點睇都係不君子行為。如果，只係如果，如果盲反派純粹想講番馮檢基參選對工黨劉小麗嘅選情有幾大影響，呢個係可理解嘅，因為相同陣營有另一個人出選，對個陣營本身力薦嘅參選人一定有影響；但而家盲反派用盡各種手法抹黑馮檢基，而家越講越誇張，以選民鍾意鋤強扶弱嘅心態，會唔會反而幫咗馮檢基「登基」呢？大家唔好低估同情票嘅力量！

大家唔好忘記，過去幾十年，盲反派一直都將馮檢基歸納為「同路人」，一直冇話過佢「收人錢」、亦一直冇批評過佢成為建制派，而家馮檢基只係唔滿意你班人「圍威喂」，堅持根據民主原則行出嚟參選啫，因乜突然變成盲反派嘅敵人之餘，仲要突然湧出一埋「黑材料」呀？佢啲嘢你班盲反派一早都知架啦，因為以為馮檢基肯聽你班人話，所以就「包容」佢呀？如果真係咁，你班盲反派都好可恥喎，原來一切都唔係按原則辦事，而係按利益辦事？

自稱得「民主派」，好心盲反派班人就有啲民主素養，尊重下其他參選人嘅權利啦。已報名參選立法會九龍西補選嘅有食物及衛生局前政治助理陳凱欣，另外沙田區議員陳國強同中出羊子亦已經宣布參選。

原圖：Takungpao