立法會九龍西補選提名期前幾日開始，各路人馬都已經宣布參選甚至報埋名參選，其中一個已經報名參選嘅食物及衛生局前政治助理陳凱欣日前落區嘅時候，就畀「人民力量」譚得志（下稱「快必」）等人狙擊，期間「快必」一時鬧人「懵炳」，一時又叫人「走啦阿婆，番去紋眉啦你」；老實講，喺人哋做緊宣傳嘅時候滋擾人已經無品，「快必」仲要玩埋人身攻擊，原來盲反派嘅民主，係咁有質素嘅！

無品格可言的政治狙擊

陳凱欣日前喺社交平台表示，自己喺紅磡黃埔花園同市民交流時遇上「阻滯」，又上載埋相關片段。從影片可見，「快必」不斷走近陳凱欣，係咁要陳凱欣「答問題」；當有市民勸「快必」時，「快必」反而一時話人「懵炳」，一時又叫人「走啦阿婆，番去紋眉啦你」。呢啲係討論？呢啲係民主應有嘅表現？盲反派班人擺明就係做爛仔，玩死纏難打啦！

老實講，選舉期間唔同參選人或者候選人嘅支持者互相指罵嘅情況好常見，但囍雨今次睇番條片，基本上陳凱欣或者佢嘅支持者全程都只係想同市民交流，但「快必」就係咁追住人嚟「質問」，又玩人身政擊；囍雨覺得大家應該睇清楚呢班所謂「民主派」嘅人，佢哋嘅民主，就係覺得自己大晒，隨時隨地都可以粗暴對待唔同政見嘅人，仲要以為自己好威添。

狙擊陸續有來

距離九西補選投票日仲有個幾月，可以預計得到，類似嘅情況仍然會繼續出現。但囍雨喺度要奉勸一下盲反派，你哋一邊以哀兵姿態參選，講到自己情況好慘咁，一邊你哋啲「自己友」就好似啲「惡人物」咁去狙擊其他人；表面上你哋贏咗場架，但市民看在眼裡，睇到所謂「民主派」，唔單止唔民主（如出口術阻人參選），連基本禮貌同尊重都冇，市民又會點諗呢？

已報名參選立法會九龍西補選嘅有工黨劉小麗、前立法會議員馮檢基，另外沙田區議員陳國強及中出羊子亦宣布會參選。　

原圖：陳凱欣Facebook專頁