校園又發生粗暴事件！一班唔滿意學校對民主牆安排嘅理大學生，「浩浩蕩蕩」咁想衝去校長室搵校長理論，感覺好似黑社會「刮友」咁，一班人最後搵唔到校長，而暫任副校長沈岐文同教務長莫志明就出咗嚟同班學生傾，班學生態度惡劣之餘，甚至唔畀沈、莫離開，仲將莫志明整跌，甚有非法禁錮之嫌。理大校方對有關學生嘅粗暴行為深表痛心，除予以譴責外，將會按既定程序跟進事件，嚴肅處理。囍雨就覺得，呢班學生表達意見好似黑社會「追數」咁，如果唔嚴肅處理事件，大學根本無日安寧。

不滿民主牆安排 不等於可以為所欲為

觸發今次理大學生「圍」教職員事件，係因為理大學生唔滿意佢哋整出嚟嘅所謂「連儂牆」（紀念違法佔領四週年用）被校方用紅紙遮蓋，所以一班學生會代表好似黑幫刮友咁衝上校長室，期間仲用埋大聲公大叫「唐偉章（理大校長）同我出嚟！」，十足十尋仇咁款；之後上到校長室唔見校長而見到另外兩名管理層，呢班學生態度差之餘，仲要唔畀人走加整跌人，連保安都有受傷，囍雨要問班學生一句，你哋係咪玩非法禁錮同傷人先？

唔滿意民主牆安排，可以搵校方傾，但絕對唔等於可以為所欲為。囍雨就覺得，呢班學生唔單止覺得自己大晒，甚至覺得佢哋有權呼喝、質問、禁錮甚至整傷教職員；面對呢種咁粗暴嘅情況，囍雨覺得理大校方單純喺學校層面處理事件都未必足夠，最好方法就係報警，等警方查個清清楚楚，睇下班學生「狙擊」學校管理層嘅過程中有冇人違法！

報警都冇用？

不過，有網民就笑言，就算理大報警都冇用，因為根據近期嘅一單掟杯案嘅法庭判決，如果受襲者冇受驚表情，都可能告施襲者唔入；囍雨諗諗下又講得啱喎，理大學務長莫志明畀人撞跌嘅時候，起番身自己都笑晒口，如果話係襲擊真係未必告得入。唉，明明係一個學習嘅地方，就搞到好似「街頭武鬥」咁，大家話香港嘅大學而家發生咩事呢？

值得一提嘅係，有傳媒報道其中一個「怒衝」理大教職員嘅學生，其實係「港獨」組織「學生獨立聯盟」嘅骨幹成員何俊謙；咁講法，似乎「港獨」派唔單止已經滲入校園，仲已經開始喺唔同大學作浪興波，大家真係要小心呀！

原圖：理大學生報編委會直播影片截圖