擺明支持「港獨式」自決嘅工黨劉小麗已經報咗名參加立法會九龍西補選，但近日有傳媒踢爆，話劉小麗喺2016年立法會競選期間，曾經承諾每月會捐出議員薪酬嘅一半畀社區團體，同長者「同甘共苦」，早前又聲稱已經「找數」，但有關媒體就指出，劉小麗所捐嘅款項，有超過九成都係捐畀「自己友」，有「左手交右手」之嫌。廣男仔細睇相關報道，其實劉小麗捐款畀「自己友」或者唔算出奇，但呢班人又幫番佢助選或站台，其實喺道德甚至法律上，到底有冇問題呢？

「左手交右手」的關係網

根據傳媒報道，劉小麗有超過九成捐款係捐畀四個團體：「香港婦女勞工協會」獲13.3萬元、「香港廚師聯盟」獲10萬元、「永別劍橋康橋工作小組」獲9萬元以及「社區發展推動基金」獲8.3萬元，據報呢四個團體都係劉小麗嘅助選團。劉小麗曾向公眾承諾捐錢畀社區團體，而如果傳媒報道屬實，原來佢絕大部分嘅錢都係捐畀同佢有政治聯繫甚至佢嘅助選團，咁樣即係以捐款畀社區為名，實則益自己友啫！

廣男上網查下呢啲團體到底係註冊社團定慈善機構啦，發現當中「香港廚師聯盟」同「永別劍橋康橋工作小組」既唔係咩註冊社團，亦唔係根據《稅務條例》第88條獲豁免繳稅嘅慈善機構及慈善信託，點解劉小麗要畀錢畀一啲既非社團、又非慈善機構嘅組織呢？據報「香港廚師聯盟」曾經幫劉小麗助選，而「永別劍橋康橋工作小組」直頭係工黨張超雄同社福界立法會議員邵家臻嘅組織，劉小麗所謂捐款畀社區團體，其實係將啲錢畀番自己友，然後再等啲自己友選舉幫番佢，即所謂捐款，點睇似係政治酬庸多啲囉。

慈善機構可以做政治工作嗎？

另一個問題，就係劉小麗有捐錢畀佢嘅「香港婦女勞工協會」，係一個根據《稅務條例》第88條豁免繳稅嘅慈善機構，以廣男所知，慈善機構係唔可以做有政治目的嘅工作架喎，佢哋嘅總幹事胡美蓮日前直頭到企埋出嚟為劉小麗站台，傳媒報道佢用嘅名義係「香港婦女勞工協會總幹事胡美蓮」；而家有人掛正慈善團體牌頭做政治嘢，稅務局係咪要做下嘢呢？

老實講，捐錢畀自己相熟團體，冇問題，但捐完錢畀自己友而班自己友又同番劉小麗助選，咁樣如果法律上都冇問題嘅話，咁其他人又捐番十萬八萬畀唔同團體，然後參選嘅時候呢班收過捐款嘅團體又出嚟幫番呢啲人助選，變相利益輸送，咁香港嘅選舉法例會唔會變咗形同虛設呢？廣男唔肯定，但無論係執法部門定係稅務局，都可以留意下呢單嘢；而曾經因為劉小麗捐款承諾而支持佢入立法會嘅人，廣男只能講一句，你哋畀人Fake咗喇！

除咗劉小麗，食物及衛生局前政治助理陳凱欣同前立法會議員馮檢基已報名參選，另外沙田區議員陳國強同中出羊子日前亦宣布咗會參選。

原圖：Takungpao