俗稱為「土地大辯論」嘅公眾諮詢結束，特首林鄭月娥又會喺下星期三發表《施政報告》，外界最關注嘅就係政府諗住點解決土地房屋問題；一向倡議填海嘅大型智庫組織就拍咗條片撐填海，仲請埋劉德華做影片嘅旁白，劉德華表示喺坊間眾多建議裡面，佢覺得東大嶼山嘅大規模人工島方案，睇嚟喺比較可取，仲話取捨在所難免。呢條片一出，旋即引嚟支持盲反派嘅網民瘋狂攻訐，有啲人對劉德華人身攻擊，有啲甚至連劉德華屋企人都攞嚟講；囍雨真係要問一句，乜而家香港人惡到連其他人發表意見都唔畀，真係連天王都無面畀？

劉德華表達意見 何罪之有？

當一班網民「煞有介事」咁狂砌劉德華，囍雨都好好奇到底劉德華講咗啲乜搞到人咁大反應，於是就上網睇下條片啦。喺呢條影片旁白，劉德華話而家香港人面對「上唔到車、租唔到樓、返工迫、放假仲迫」嘅困局，令部份人覺得無希望，而若果香港出現一大片全新土地，就會多好多空間起公營房屋同設施，加快改善基層生活，佢覺得東大嶼嘅大規模人工島方案，睇嚟比較可取，仲話值得做就應該捉緊機會馬上做，想香港繼續向前行，取捨係在所難免。

睇完劉德華呢番說話，囍雨覺得劉德華講嘅嘢非常正路，亦無話要刻意討好邊個邊個，班網民有需要係咁砌佢咩？有人唔同意填海，有人覺得應該先發展棕地、粉嶺高球場，呢啲都冇問題，每個人都可以表達佢哋嘅意見，而且係喺自由、不被脅方嘅情況下表達；同理，劉德華作為知名藝人好、香港市民也好，佢都一樣有表達意見嘅自由架喎，其他人有唔同意見，有需要人身攻擊甚至攞嚟人哋屋企人嚟講咩？曾經被譽為「民間特首」嘅劉德華，一下子打入十八層地獄，成為某啲人心中嘅「牛鬼蛇神」，但講到尾，呢班人都係政治立場先行啫！

誰住在填海地上？

當部份人「堅決反對」填海嘅時候，囍雨覺得大家真係要諗下香港而家有幾多地方係填海填番嚟；政府喺幾十年前開始大力發展新市鎮，沙田、大埔、屯門、荃灣、將軍澳同東涌都有唔少地係填海填番嚟，如果香港冇呢啲新市鎮，當年甚至而家嘅香港人又點可能安居置業呢？囍雨真心覺得劉德華講得啱，要香港出現一大片全新土地，除咗填海真係別無他想！至於盲反派班支持者成日講嘅單程證、每日150個內地新移民嘅問題，囍雨自己身邊都有親人係內地新移民（相信好多人都係），歧視自己親人、阻止人嚟香港一家團聚嘅歧視行為，囍雨真係做唔出！

原圖：Takungpao