香港嘅山頭近年不時被人掛上印有政治標語嘅直幡，呢啲直幡次次都印到大大幅，好似早幾日之嘛，獅子山郊野公園對上筆架山就出現一條非法懸掛、2米乘8米嘅大型直幡，搞到消防人員被迫登山拆除。呢類個案接二連三出現，雖然社會各界已經講明，呢類行為對社會有一定危險性，但嗰班疑似盲反派偏偏唔理，為咗表達一己政治訴求，明知係置他人生命於險境仍然繼續，理應受到社會譴責！

山頭掛直幡 既違法又自私

到底上山掛直幡有咩問題呢？首先，呢個行為本身已經係違法，由於直幡位置係屬於野公園範圍，根據法例，任何人未經許可展示條幅等，最高可被判罰款二千元同監禁三個月；呢條法例係一視同仁嘅，同政治立場完全無關，就算你掛嗰條直幡、條幅係支持政府都好，若然事前冇獲得政府部門批准的話，一樣係違法。

查實大家有冇諗過，點解政府唔有樣學樣掛大大條直幡上各個山頭，例如「清潔香港，人人有責」之類，咁咪可以一勞永逸，唔使驚班人再次掛直幡上去囉！呢個咪就係「自私」同「維護公眾利益」嘅分別囉，政府考慮嘅係人命安全，而班自私自利嘅示威者就只考慮政治表態，有傳媒報道就得架喇，人命？使乜理咁多呀！

唔係吹水架，大家試諗吓，懸掛直幡嘅地點一定係比較接近市區嘅山頭，若然條直幡意外脫落，隨時會跌落去車路、行人路，甚至山下嘅民居，有機會整傷人係梗架啦，若然咁啱遮住行駛中車輛嘅擋風玻璃，後果就更加不堪設想。仲有喎，消防員拆呢類直幡係要由山頭游繩落去，唔使問都知有危險性，可想而知掛直幡嗰班人係幾咁自私！

置消防人員安危於不顧

消防人員做得消防呢一行，當然知道會有一定危險，但大家記住喎，掛直幡咁嘅呢類抗議活動唔同火警火災，呢類示威活動根本就唔屬於「意外」，而係人為咁增加消防人員嘅工作量，同埋令佢哋冒原來唔需要冒嘅風險。呢類行為性質，同嗰班「颱風追風者」以及「天氣惡劣情況下登山者」一樣，完全係自私自利同埋無視他人安危！而呢類咁冇品嘅行為，好大機會係出自一班成日將「自由、民主、人權、法治」掛喺口邊嘅人，係唔係好諷刺先？

原圖：news.tvb