幾個月前，「違法佔領」發起人戴耀廷到台灣出席「五獨論壇」公開播「獨」，結果搞到全城圍插；唔知佢係真心想搞「港獨」定係要「鬥氣」，所以近期出咗十篇文講「港獨」之餘，最近仲飛埋去歐洲出席歐洲議會嘅研討會，話香港特區政府畫下紅線，唔可以講「香港獨立」，造成「寒蟬效應」。觀乎戴耀廷嘅套路，囍雨認為佢又係想帶出講「港獨」係自由嘅歪理，佢而家飛埋去歐洲播「獨」，係咪想走出香港，為佢嘅「港獨路」爭取國際支持呢？

飛去歐洲唱香港

根據傳媒報道，戴耀廷今次飛去歐洲，其實都係想唱衰香港，佢除咗話政府官員為「港獨」畫下紅線之外，佢表示學校敢再舉辦「港獨」講座，學者亦擔心應否寫「港獨」研究論文，又提到將來《基本法》第23條立法，佢嘅言論屆時好可能會觸犯法例，咁樣正正反映香港嘅言論自由愈收愈窄喎。講咁多嘢，即係想話畀人聽宣揚「港獨」冇錯，政府反對「港獨」、依法執法就唔得囉！

囍雨就覺得，戴耀廷話學校唔敢搞「港獨」講座、學者擔心可唔可以寫「港獨」研究文章，其實佢講果個，根本就係佢自己；但大家諗一諗，如果受公帑資助嘅大學同學者研究擺明違反《基本法》嘅「港獨」，咁咪即係變相用公帑資助「港獨」，咁唔係仲唔合理咩？戴耀廷身為香港頂尖學府嘅法律學者，想用公帑、公共資源搞「港獨」活動，會唔會太過「妙想天開」呢？

別有用心的唱衰之旅

今次戴耀廷衝出亞洲，去到歐洲講「港獨」、言論自由等問題，囍雨就覺得係「別有用心」，事關「港獨」喺香港一定不得民心，但外國例如歐洲唔同國家，佢哋未必知道「港獨」實際係一回咩事，戴耀廷去歐洲爭取外國支持，到第日如果佢發生咩事，又可以好似「雙學三人」咁得到國際社會聲援，甚至得到「良心犯」嘅稱號。更恐怖嘅係，戴耀廷由台灣開始，開創喺香港以外地方宣揚「港獨」嘅先例，佢唔單止要「港獨」喺香港遍地開花，而係想將「港獨」歪論帶到全世界！

有一點囍雨覺得啱嘅，就係《基本法》第23條一日未立法，一日都未必有法例應對好似戴耀廷呢啲「研究」「港獨」嘅政客；但囍雨肯定，如果有一日政府要加快就23條立法，戴耀廷一定「功不可沒」，大家食住花生睇下戴耀廷到時仲有冇咁招積啦！

原圖：鳳凰網