前一排飛去英國炒作UGL事件嘅民主黨立法會議員林卓廷又有新聞，最近民主黨鬧出「雙牌頭」風波，據報民主黨唔畀黨員同時掛民主黨同地區關注組兩個牌頭參政，又爆出林卓廷安插親信落區搞到同其他自己友「撞區」；有消息就指，原來好多人不滿林卓廷口沒遮攔，態度高傲，之前喺立法會選舉勝出後仲揚言「我下屆參選唔需要樁腳」。林卓廷自己否認有關言論，又話如果對方有證據就應該攞出嚟，希望大家唔好抹黑攻擊咁話。嗱，乜原來林卓廷知道指控人要拎證據出嚟，唔係指吓個鼻話自己就係證據就得架？咁佢同個所謂「天下為公」活動喺「UGL事件」上不斷叫梁振英「自證清白」，到底係咩玩法呢？唔通又係雙重標準？

林卓廷快自證清白

UGL事件發生咗差唔多四年，極度喜歡炒作UGL事件嘅林卓廷成日話懷疑全國政協副主席、前特首梁振英犯咗法，但總係攞唔出證據，仲要掉番轉叫梁振英攞證據出嚟證明自己清白。如果今次套用番林卓廷嘅「神邏輯」，而家有人話林卓廷極度串咀地話自己「下屆參選唔需要樁腳」，而家係咪應該由林卓廷提出證據，證明自己冇講過下屆參選唔駛樁腳幫手呢？如果佢攞唔出證據嘅，咁佢可能真係咁講過架喎！

廣男個人認為，林卓廷講得出呢番說話真係一啲都唔出奇，點解？因為民主黨喺新界東嘅底氣的確係非常厚。喺2008年嘅立法會選舉，民主黨連同之後合併入去嘅前綫，就喺新界東攞咗三個議席，包括劉慧卿、黃成智同鄭家富；雖然去到2012年、2016年選舉佢哋喺新界東嘅成績已經大不如前，但喺2016年選舉要保住林卓廷一席，基本上無大難度。民主黨作為老牌政黨，新界東又係傳統盲反派票倉嘅大選區，林卓廷覺得自己唔需要樁腳都穩佔一席，真係一啲都唔奇。

林卓廷或自招惡果

不過咁，廣男就覺得有時選舉嘅嘢，唔應該單從數字去睇；冇錯，民主黨喺盲反派裡面或者新界東嘅底氣雖然好足夠，但民主黨以至林卓廷都唔應該忘記，民主黨喺五大選區之所以穩佔一席，全因為民主黨嘅地區工作較其他盲反派好。大家諗下，如果林卓廷搞到自己無晒樁腳，而自己成日玩政治炒作又搞到畀市民唾棄，佢係咪仲可以好穩陣咁喺新界東連任呢？廣男認為就未必喇！

原圖：Takungpao