已宣布參加十一月立法會九龍西補選嘅工黨劉小麗，日前被問到有關「自決」嘅問題時，竟公然講大話！佢話喎，自己從不支持「港獨」，又解釋所謂「自決」一路係講社會自強、爭取政制自決同生活自主等等；講就好巧妙喇，實情又係點呢？囍雨特登走去搵返舊資料，發現劉小麗兩年前曾經聯署一份聲明，清清楚楚咁講到支持「掙脫《基本法》框架、捍衛『香港獨立』作為港人自決前途的選項」。劉小麗作為立法會選舉參選人，竟然公然對住傳媒講大話，認真可惡呀！

劉小麗曾簽擁「香港獨立」

劉小麗所聯署嘅嗰份聲明，日期係2016年7月30日，聯署人除咗劉小麗之外，仲有今日已經成為立法會議員嘅朱凱廸，同埋「半港獨」組織香港眾志。好喇，份聲明上面寫乜呢，為咗唔想畀人話曲解佢哋嘅說法，囍雨直接引述如下：

1)      「此刻，香港政府不但正式引入伊朗式選舉制度於香港，以政治主張篩選參選資格，逼令政治參與者順從中共許可的政治框架，更為香港的前途設限，以一紙聲明刪去港人自決未來的選項之一——香港獨立。」

2)      「我們的共同政治綱領是「民主自決」。民主自決的政治意義本就是要超越所有對人民的限制，包括是《基本法》的限制，以民主的方式讓人民決定自身的命運和香港前途。」

3)      「若香港人要決定未來，自主命運和前途選項，我們不得不從「《基本法》是唯一基礎」的思想框架中掙脫，香港的命運應由香港人決定，而非《基本法》，更非北京或香港政府。」

4)      「因此，站在民主自決的立場，面對著政權以無理、粗暴的行政程序、法律條文限制人民的自決命運的自由，我們定必捍衛『香港獨立』作為港人自決前途的選項。」

戳破劉小麗講大話　市民認清真面目

劉小麗有份聯署嘅呢篇聲明，到今日仍然可以喺網上面搵到，大家如果唔相信嘅，不妨自己上網搵吓。唔使囍雨解釋，大家單係睇字面已經知道劉小麗心中嘅所謂「自決」，絕對唔係佢今日口中嘅「社會自強、爭取政制自決同生活自主」，而係要求擺脫《基本法》規限，將「港獨」列為香港前途嘅選項之一，上述種種嘅主張，絕對係毫無疑問咁違反《基本法》規定，持有呢類主張嘅人，真係合乎《基本法》嘅參選要求咩？大家自己判斷吓。

不過咁，呢篇文章主調並唔係質疑劉小麗嘅參選資格；囍雨最想指出嘅係，劉小麗根本就係講緊大話，一個曾經當選過立法會議員、而家又準備參加補選嘅人；一個成日將自由、民主、公義掛喺口邊嘅人，今日竟然當住全香港傳媒面對，面不紅、氣不喘咁公然講大話，呢種人真係有資格去做代議士咩？記住喎，劉小麗並唔係話自己「放棄自決」喎，而係選擇「打倒自己昨日的承諾」，選民係咪仲要支持呢種人？大家自己諗諗啦。

原圖：大公報