呢幾日盲反派嘅動向好有趣，呢頭有報紙踢爆劉小麗早前喺一個盲反派聚會上表示要「去馬」（即參選立法會九龍西補選），劉小麗即日下晝就宣布自己參選，好似驚死畀人話佢偷步籌款、拉票咁；更離奇嘅係，劉小麗話自己所講嘅「自決」，係指「政制上自決」，自己唔係支持「港獨」。咪住先，佢自己個網站之前好似唔係咁寫架喎，佢而家將「為香港爭取前途自決」變成「政制上自決」，個龍門好似搬得誇張啲喎！為咗選舉，劉小麗真係乜都講得出口！

為香港爭取前途自決？

如果劉小麗話自己唔支持「港獨」，只係支持「政制上自決」，咁大家當然可以理解為佢只係想爭取盲反派認為合適嘅普選方案啦！但佢講嘅「自決」係咪咁簡單呢，不如囍雨同大家Fact Check下佢講過啲乜啦！根據傳報道，劉小麗早前已經好鬼崇咁將佢個人網站入面一啲有關「自決」字眼嘅頁面刪除咗，例如佢嘅「小麗民主教室」網站喺7月26日仲有篇文提及「香港人有政治自決的權利，有權決定自己的政治地位、擁有自主的政府、立法議會，以及獨立的司法體系」；又或者喺8月18日仲有篇文寫住「為香港爭取前途自決，為我們的下一代重奪光明的未來」。

對於「香港人有政治自決的權利」、「為香港爭取前途自決」等字眼，大家點理解呢？囍雨作為一個平常人，Get到嘅意思就係劉小麗想爭取前途自決，前途可以係香港繼續係中國特區，亦可以係香港成為獨立國家，咁解法劉小麗同「香港眾志」嘅「自決」論，又真係冇乜大分別，如果周庭要被DQ的話，囍雨個人認為劉小麗都相當危險！

劉小麗應該解釋清楚

撇除劉小麗之前宣誓玩嘢被DQ、話捐議員人工又捐唔足等德行有虧嘅行為，囍雨覺得如果劉小麗真係想「入閘」做候選人，都起碼講清楚「香港人有政治自決的權利」、「為香港爭取前途自決」到底係咩意思先？唔係話搬咗個龍門就當無事架？如果佢之前呢番說話帶有「港獨」含意而佢而家立場改變咗，都冇問題，但前提佢自己要講清講楚，等其他人甚至政府選舉主任相信佢唔係搞「前途自決」同「港獨」嘛，大家話係唔係喇？

原圖：Takungpao