超強颱風「山竹」襲港，搞到香港滿目瘡痍，廣男留意到一個比過往都震憾嘅畫面，就係香港唔少地方除咗有冧樹、雜物飛散之外，一啲沿海地方例如杏花邨、西貢碼頭、屯門、將軍澳、石澳等地方，都有大量塑膠垃圾湧上岸，當中主要有發泡膠同膠樽等；有市民無奈地表示，香港人自己製造咁多垃圾，而家要「自食其果」。廣男就覺得，海洋垃圾好、極端天氣好，其實都係我哋一手一腳製造出嚟，今日我哋可以唔面對問題，而將問題留畀下一代，到時仲係咪可以補救到呢？

杏花村成「塑膠村」？

呢幾日睇過咁多新聞片段，廣男覺得最震撼嘅一定係杏花村水浸同滿佈海洋垃圾嘅畫面，佢嘅主要馬路盛泰道喺風災當晚變成「垃圾河」，到噚日依然偏地垃圾，有傳媒就發現當中大量膠樽嘅招紙都係用繁體字作為字體，即係話呢啲垃圾好有可能係「香港製造」，而唔係由其他地方漂嚟嘅。

其實塑膠唔同其他垃圾，基本上係極難分解，如果有一件塑膠垃圾跌咗落海，可能要用幾百甚至一千年時間先可以分解；廣男覺得呢啲海洋垃圾提醒咗我哋，平時大家覺得香港甚至地球好乾淨，但一個風災嚟到，就將啲垃圾還番晒畀大家，我哋的確有需要諗下係咪要改變生活習慣，尤其係減少製造塑膠的習慣。

可以一路「數錢」 一路停止呼吸嗎？

根據環境保護署上年年尾公布嘅「2016年都市固體廢物監察報告」，每個香港人平均每日棄置1.41公斤垃圾，數字係十年新高， 2016年全年本港廢物產生量為570萬公噸；而根據2015年的固體廢物數字，剩係棄置於堆填區嘅塑膠就有近80萬公噸，大家可以想像到我哋每年到底製造咗幾多垃圾。

老實講，環保係一種由細細個就要培養好嘅意識，坦白講廣男自己都做唔到完全「走塑」，但為咗香港、地球嘅未來，大家係咪都要一分力呢？最近廣男同屋企人睇緊一套叫《再創世紀》嘅電視劇，劇入面一個主角畀人問佢做乜要人花錢投資喺環保項目嘅時候，佢就提出經濟定環保重要嘅問題，再反問一句「你唔可唔以一路數銀紙，一路停止呼吸？」冇錯，就算幾有錢都好，如果我哋身處嘅環境出咗問題，有錢都冇用啦！

原圖：RTHK