十號颶風「山竹」吹襲香港，呢個本港有史以嚟最強颱風為香港帶嚟極大破壞，冧樹、水浸隨處可見，有商業大廈以至住宅嘅窗口都畀強風吹爛。正當大部份香港人都喺屋企「避風」嘅時候，有一班喺風災依然緊守崗位、全力救災嘅紀律部隊，冒住危險進行唔同嘅救援工作。囍雨覺得，但每當危急關頭，企出嚟救急扶急嘅始終都係香港紀律部隊，囍雨喺度實在要向紀律部隊以至其他喺風暴期間工作嘅香港人致敬。

非一般災情 非一般救援

今次「山竹」襲港，一啲臨海或者低窪地區可以話係面臨極大挑戰，例如鯉魚門三家村有村民選擇喺風暴下留守，警方同消防因應水浸情況入三家村呼籲同協助村民離開，期間有警員喺協助居民撤離到庇護中心時不幸受傷，需要送院治理；另外，由於「山竹」實在「太強」嘅關係，警方同消防除咗要協助受困市民，亦要不斷處理冧樹、升降機故障以至爆窗等求助個案。唔同嘅紀律部隊為咗救人而將「生命作賭注」，真係一啲都冇咁誇張。

囍雨雖然唔係紀律部隊冇份參與任何救援工作，但噚日個風絕對唔係令救援工作「有困難」咁簡單，而係喺風暴下想「行兩步」都難；當平常人想喺風暴下「行兩步」都困難嘅情況下，大家可以想像到紀律部隊成員要喺風暴下救人、處理冧樹等問題，難度實在係難以想象。身邊有朋友話，香港呢個石屎森林遇上咁強嘅風暴都安然無羔係一啲都唔簡單；囍雨就覺得，香港能夠有咁高質素嘅紀律部隊，同樣係一啲都唔簡單。

向在風災工作的人致敬

除咗紀律部隊之外，一啲從事保安、醫護等工作嘅人有唔少同樣要喺風暴襲港嘅時候工作，囍雨覺得大家都應該向呢班喺危急情況依然緊守崗位嘅人致敬。近年，大家成日聽到有批評話香港嘅紀律部隊（尤其係警察）呢樣唔好、果樣有問題，但當有咩災難發生嘅時候，我哋就係靠呢班紀律部隊幫我哋、救我哋；批評往往好容易，但有時要都要懂得尊重、欣賞嘅！

原圖：Wenweipo