近年潮流興講「身份認同」，但部份人所謂嘅「身份認同」，並唔係單純指自己係香港人咁簡單，而係「我只係香港人而唔係中國人」，甚有「港獨」味道。廣男噚日睇到單新聞，指「議會陣線」立法會議員毛孟靜喺一個國際會議上面，冇坐喺大會安排、有中國國旗標識嘅特定座位上面，反而走咗去「無國籍人士」區域；廣男第一時間諗到係，人人都有權唔認中國人，冇人可以強迫，但毛孟靜就係唔得！點解？佢係用中國公民身份參選立法會做到議員架，佢而家唔認係中國人，咁佢憑乜繼續做議員呀？辭職啦！

毛孟靜 無國籍？

事緣首屆國際國會女議員大會日前喺愛爾蘭舉行，毛孟靜同民建聯立法會議員葛珮帆都有出席，明明大會安排出席議員坐喺桌面放有所屬國家國旗標示嘅特定位置，仲按照英文字母嚟順序分配座位，但毛孟靜就走去冇國旗標示嘅後方位置，擺明唔願意坐喺中國國旗所在嘅位置，好似寧願做個「無國籍人士」咁。廣男實在懷疑，毛孟靜係唔想認自己係中國人。

根據另一個有份出席會議嘅議員葛珮帆所講，毛孟靜喺當地發表嘅社交媒體貼文，根本唔係分享咩會議經驗，而係抹黑葛珮帆嘅海水化淡建議，肆意醜化中國，好似「反中凌駕一切」；而毛孟靜就回覆傳媒，話成個會議係free seating (自由選擇坐位)，自己「豈敢『代表』中國」。廣男就覺得，話明國際國會女議員大會，出席議員梗係有所代表嘅國家架啦，大家不如問下毛孟靜如果唔係代表中國，佢又係代表邊個國家呢？

不認中國人 何必當議員

有人話一啲人「不經意」嘅行為（廣男唔覺得毛孟靜係「不經意」呀）其實係反映果個人內心嘅一啲想法，毛孟靜去國際會議唔係代表中國而係「無國籍人士」，其實都唔緊要嘅，呢啲畢竟係佢嘅自由，佢甚至放棄埋中國公民身份都仲得；不過，廣男睇到《立法會條例》寫明立法會地區選區嘅候選人，要係香港永久性居民中嘅中國公民，如果毛孟靜放棄埋做中國公民、唔做立法會議員，咁就真係做得徹底喇，不過唔知佢有冇呢個「勇氣」呢？

原圖：Takungpao