租用政府物業做會址嘅香港外國記者會（FCC），早排一意孤行為「港獨」份子提供宣傳平台、邀請香港民族黨召開人陳浩天做午餐會嘉賓，結果引嚟對「港獨」深惡痛絕嘅全國政協副主席梁振英批評。梁振英尋日援引FCC會址租約條文，清楚指出政府有權回收相關物業；梁振英就「港獨」問題發出振聾發聵嘅反對聲，有人唔贊成咪公開辯論囉，偏偏反對派喉舌《生果報》出埋晒啲「邋遢」招，報道內容玩誤導外、啲專欄作家更係為鬧而鬧，連自打嘴巴都唔理，認真羞家。

標題與內文有衝突

《生果報》毫無公信力就係人都知，但勢估唔到錯得咁離譜。今日之嘛，份報紙裡面有篇報道，題為《689避提親批FCC租約》；睇到條題，囍雨即時心諗乜咁奇怪嘅，明明尋日已經有大量傳媒報道，話梁振英回應咗當年在任時批租畀FCC嘅問題架喇喎，《生果報》點可能唔知呀？

為咗求證求真，囍雨特登上梁振英個人社交網站睇睇，梁振英清清楚楚寫到明：「有傳媒問：為什麼在我任內，特區政府將會址續租給FCC？答案很簡單：如果當年FCC請人宣揚港獨，我肯定不會同意續租。」行文好簡單啫，咪就係因為當年FCC續租時冇協助「港獨」份子宣揚分裂國土嘅理念，所以特區政府咪續租囉，有幾難明呀？

《生果報》玩嘢味濃

睇完標題，睇埋內文就知有誤導，報道原來有寫到：「他（梁振英）中午再度發文回應當日親自續租予FCC，指『如果當年FCC請人宣揚港獨，我肯定不會同意續租』」。係囉，個記者有寫架喎，咁點解篇報道會起條咁嘅題呢？睇到呢度，加上《生果報》嘅往績，唯一嘅「公允評論」就係：「擺明玩嘢」、博人唔睇內文。

除咗報道之外，《生果報》今日有篇專檔文章都好吊詭架，呢篇題為〈宰相的鬍子〉嘅文章話，所謂「不在其位，不謀其政」，梁先生（梁振英）早卸任特首，應知所避忌，不應對現任政府施政指手畫腳……吓？乜原來《生果報》同反對派係咁睇架咩？咁前高官陳方安生同王永平又應唔應該「不在其位，不謀其政」呀？定係喺反對派眼中，鬧政府就可以「謀其政」，鬧反對派就要噤若寒蟬呢？

老屈梁振英打壓 《生果報》令人不齒

講到底，《生果報》做咁多衰嘢，目的都係想盲撐FCC、塑造梁振英「打壓」FCC嘅印象啫。大家諗深一層，梁振英講法律、講租約條文、講道理、同FCC公開辯論，咁都叫「打壓」？如果咁都算的話，咁香港唔需要言論自由啦，剩係畀《生果報》同盲反派講晒就得啦！「打壓」？邊度嚟「打壓」呀？係「打壓」你就唔同你講法律、唔使同FCC公開辯論啦，《生果報》！

原圖：《蘋果日報》截圖