眾所周知，香港外國記者會（FCC）家陣嘅會址係政府物業，但社會大眾之前對租約條文卻係一無所知，即使想去查冊亦查唔到，可以話係非常神秘。直到尋晚，特區政府終於從善如流，公開FCC租約條文同內容，誰不知一眾反對派喉舌傳媒唔係走去研究租約條文，而係集中去講「梁振英知FCC交市值租」、「梁振英授權簽訂FCC會址租契」等，好明顯係本末倒置，轉移視線味道極濃。到底呢類所謂報道嘅謬誤在於邊度呢，等囍雨喺度解釋畀大家聽啦！

FCC當日並無為「港獨」搭棚

根據政府尋日公開嘅FCC會址租契，當中除咗訂明該會每月要畀55萬元租金、租期由2016年1月1日到2023年1月1日外，內容仲顯示呢份租約簽署日期係2015年12月29日，而代表政府去簽租約嘅其實係政府產業署一個總產業經理，佢係喺時任特首梁振英授權下，負責簽訂租契同蓋印。正因為呢一重「授權」，啲反對派喉舌傳媒即時大造文章，一時話梁振英一早知佢FCC係交市值租啦、一時又話梁振英「授權」去出租個物業畀FCC，質疑梁振英理應熟悉有關租約，之前唔應該成日叫人公開租約內容，到底呢種說法合唔合理呢？

答案當然係唔合理啦！其實道理好簡單架咋，正如梁振英自己今日喺社交網站所講，乜當年續租嘅時候，FCC有為好似陳浩天咁嘅「港獨」份子搭建宣傳「港獨」嘅平台，甚至令陳浩天可以利用FCC本身嘅影響力，等佢可以將「港獨」理念藉住一眾外國通訊社記者傳到世界各地咩？冇吖嘛！正所謂「此一時、彼一時」，當日FCC嘅情況同行為，同今日根本就唔可以比較，夾硬拉埋嚟講，無非係想營造FCC「被打壓」嘅印象啫，啲反對派喉舌傳媒真係好老土、好低劣囉。

「港獨」既是「紅線」亦是「底線」

大家記住呀，FCC以往其實亦多次邀請反對派同「反中」人士去佢哋個會址演講，但無論講乜都好，特區政府同建制派都唔會干涉，因為呢個係《基本法》賦予同保障嘅權利；但今次情況唔同，陳浩天宣揚嘅係違反《基本法》最重要嘅一條，即係希望將香港由中國領土度分裂出去，呢個咪就係梁振英口中嘅「紅線」，亦係最底最底嘅「底線」囉。冇人唔畀你講反對意見，更加冇人要打壓言論自由，只係唔容許宣揚違反《基本法》嘅訊息啫，咁都覺得有問題？

反對派、本土派、港獨派，唔理你哋係乜嘢立場同理念，囍雨懇切呼籲你哋「收手」啦，香港已經畀你哋「搞彎晒」喇，唔該唔好再透過自己嘅喉舌傳媒去創作「FCC受打壓」，又或者「梁振英打壓FCC」嘅故事，你哋心知肚明件事根本唔係咁，香港嘅言論自由一直冇受影響，你班人仍然可以暢所欲言，只係唔可以煽動同鼓吹「港獨」啫，呢個咁簡單嘅要求，對你哋嚟講真係咁難咩？

原圖：《蘋果日報》截圖