香港人可以申辦內地居住證，而港珠澳大橋又通車在即，有報道話呢啲連串嘅利好消息，再次帶動香港人到內地買樓嘅熱潮。唔少大灣區城市例如珠海，更加成為港人「掃樓」熱點。廣男讀中學嘅時候成績比較好果科係經濟，覺得其實啲人而家見大灣區建設好咗去「掃樓」，買入價都貴咗唔少喇；要買就應該好似公民黨立法會議員譚文豪咁「獨具慧眼」，一早就去咗惠州買樓。你以為人哋係盲反派就唔會去大灣區置業咩？少年，你實在太年輕了！

譚文豪「老早」到大灣區買樓

有向來支持盲反派嘅傳媒報道，佢哋以為盲反派議員唔會去大灣區買樓，點知一Check，發現公民黨立法會議員譚文豪竟然喺大灣區有樓！譚文豪就回覆傳媒，話佢惠州層樓其實早年買落，當時有親友提到去惠州買樓，佢見樓價又唔貴，就買嚟畀屋企人當度假屋用，仲話同大灣區冇乜關係，亦唔會因樓價升拎嚟炒賣咁話喎！

老實講，議員去大灣區買樓，冇問題，廣男甚至覺得大家應該歡迎啲盲反派議員去大灣區行多啲添；問題係在於，有批評指公民黨成日唱衰內地、唱衰大灣區發展，而家有成員原來一早喺大灣區置業，咁係咪一邊「唱淡」大灣區或者內地，但自己就一邊「掃貨」先？果種感覺就好似一個人同大家講前面好危險，千祈唔好再向前行，但自己就靜靜雞去咗前面執金一樣，譚文豪都係「曳曳」架喇！

歡迎盲反派多到大灣區走走

話雖如此，廣男覺得大家都唔好戴住有色眼鏡睇譚文豪，始終有盲反派議員去大灣區買樓、願意到大灣區行下都係好事嚟嘅。廣男建議，譚文豪應該帶其他盲反派議員一齊上惠州度假、四圍行下，話唔定其他盲反派議員上到去，對大灣區有唔同睇法都唔定；買唔買樓，唔緊要，最緊要係理性看待大灣區發展，唔好成日喺度玩抹黑，影響香港同其他大灣區城市合作呀嘛。

原圖：RTHK