部份香港盲反派政治人物，終日以美國呢個西方霸權馬首是瞻，一時飛去叫美國國會議員支持制裁自己國家、一時又叫美國政府干預香港內部事部，唔知真係以為美國大仁大義，比聖人更聖人添。幸好，自從美國總統特朗普上任後，國際社會終於愈來愈明白美國有幾咁霸道，單方面開徵關稅向其他國家開刀唔在講，近日呢個霸權國家嘅高官甚至明目張膽咁恐嚇國際刑事法院，話若然法院調查美軍喺阿富汗有冇犯戰爭罪行，就會即時制裁法院喎！嘩，好大嘅官威、好惡死呀，原來呢啲就係「民主」？

美國政府霸道到震

發表呢類瘋狂言論嘅，正正係喺美國位高權重嗰個美國國家安全顧問博爾頓；由於事件背景比較複雜，大家只要明白美國係為咗支持自己喺中東嘅「超級盟友」以色列、嘗試打壓同以色列有領土爭拗嘅巴勒斯坦就得喇。博爾頓講到明，美國不容許國際刑事法院或其他組織限制以色列自衛嘅權利，甚至警告國際刑事法院，如果法院調查美國喺阿富汗嘅軍事行動有冇涉及戰爭罪行，法院就會受到美國制裁，包括禁止法官同檢控人員入境，甚至作出經濟制裁，同埋根據美國刑事制度檢控相關司法人員。

仲有仲有，博爾頓話喎，美國唔會同國際刑事法院合作，亦唔會協助國際刑事法院，甚至話肯定唔會參加國際刑事法院：「我哋會等國際刑事法院自我死亡，唔理係乜意圖同目的，對美國而言，國際刑事法院已死。」

不滿意就「制裁」 非常霸權

喺呢度，廣男要公允啲講，國際刑事法院嘅成立依據係《國際刑事法院羅馬規約》，美國本身並冇簽署到呢個規約，故此佢唔同國際刑事法院合作，某程度上都可以理解。之但係咁，唔合作還唔合作，若然你自己國家軍隊，被懷疑喺有簽署呢個規約嘅國家違反戰爭罪行，咁國際刑事法院介入調查，甚至審訊，其實亦無可厚非，你美國政府最多咪唔配合、唔上庭辯護囉，唔使郁吓就話要「制裁」人呀？使唔使咁惡、咁霸道先？

唔知大家仲記唔記得，幾年前發生嘅所謂「南海仲裁案」，當年菲律賓政府向常設仲裁法院單方面提出仲裁要求，中國隨拒表明拒絕參與有關仲裁案；雖然呢個咁嘅常設仲裁法院及後繼續開審，但中國亦絕對冇話「制裁」，更加唔會話要拉要鎖、刑事檢控。

盲反派政客崇洋媚外

仲有喎，當日「南海仲裁案」宣判後，美國國務院亦高調「呼籲」各方，包括冇參與訴訟嘅中國「尊重」結果。睇返今日呢個博爾頓嘅言論，唔知大家覺得當中又有冇「尊重」呢兩個字呢？如果冇嘅，大家又有冇懷疑、思考過，點解美國政府係咁表裡不一、雙重標準嘅呢？香港部份盲反派政客，時不時就走去美國度唱衰祖國、唱衰香港，講到美國好似就係世上最公平、最公義嘅國家咁，呢啲政客咪就係「崇洋媚外」嘅最佳寫照囉。香港人，大家睇清楚事件嘅真象未呀？

原圖：The Federalist Society YouTube截圖