囍雨噚日都講過，民主黨立法會議員林卓廷、尹兆堅等人為炒作UGL，不惜眾籌問公眾攞錢，仲要用埋立法會資源去英國「跟進」UGL事件，點知英國執法機構冇畀林卓廷利用，喺林卓廷等人仲喺英國嘅時候，英國「打擊罪案調査局」（NCA）就表明審視完唔同資料後決定唔再跟進UGL事件，即係林卓廷場政治騷爛尾。今日，有傳媒向NCA查詢後並報道，NCA表明全國政協副主席梁振英冇喺英國犯法（No offences committed in the UK），又證明咗林卓廷等人絕對係老屈梁振英。林卓廷用市民錢、立法會錢去英國做大龍鳳，而家事件水落石出，林卓廷好應該道歉以及賠償公眾損失！

No offences committed in the UK

林卓廷、尹兆堅等人發起「天下為公」，仲要去埋英國搵呢個、果個去炒作UGL，完全係因為戴德梁行係英國上市公司，梁振英當時同UGL簽署離職協議，如果係咩「秘密協議」、戴德梁行唔知情、董事冇授權等情況，呢啲事喺英國管轄範圍內，英國執法機構就要跟進，而英國執法機構亦冇偏幫梁振英嘅理由；而家NCA講明梁振英冇喺英國犯法（No offences committed in the UK），好明顯係又摑咗林卓等人一大巴掌，亦都再次佐證咗所謂UGL事件根本就「冇Case」可言！事實上，早前喺NCA回覆畀林卓廷嘅函件亦寫得好清楚，NCA之所以唔再調查，其實已經就所掌握嘅資料作出慎重嘅考慮，林卓廷等人仲掉番轉話對NCA「非常失望」好似想入埋NCA數咁，真係十級無恥！

其實只要用常理諗下，UGL協議全文喺幾年前公開，協議明顯係一份律師起草又有見證人簽署嘅協議，如果真係有人貪污受賄，會唔會搵埋律師起草咁得意呢？又或者，件事呢幾年喺盲反派政客係咁炒作嘅情況下，如果個協議真係有可疑，英國執法部門仲唔做嘢？林卓廷等人以為自己借UGL抽水可以好成功，但而家「抽水抽著火水」，囍雨真係好想知道，到底佢要點向捐咗錢畀佢哋嘅市民交代呢？又或者，NCA嘅回覆，係咪印證咗林卓廷等人根本係惡意誹謗？

立場曖昧的傳媒

今日之所以再有關於UGL嘅新聞，全因為有傳媒就UGL事件向英國NCA作出查詢，但囍雨就留意到呢啲傳媒嘅報道好似有啲古怪咁。例如《香港01》喺標題就寫「NCA覆《01》不查梁振英原因：涉案不在英發生，未能處理」，但內文就寫梁振英「在英國沒有犯罪，因此NCA未能處理」，標題、內文好似唔多一致；而同樣話自己有向NCA查詢嘅《生果報》，直頭話「停查UGL案因非當地發生」，又好似冇咗梁振英冇喺英國違法嘅重點咁。不過，點講都唔緊要，唔同傳媒嘅查詢、報道，都指出咗一個明顯事實，戴德梁行作為英國上市公司賣盤、梁振英同UGL簽署離職協議而冇犯英國法律，咪即係話UGL事件「冇Case」林卓廷等人去英國係「運桔」囉！

囍雨覺得事態發展落去，林卓廷等人嘅「天下為公」，話唔定會變成全城市民怒轟林卓廷等人，叫佢哋速速「回水」嘅「天下圍攻」都唔定喎！

原圖：RTHK