民主黨立法會議員林卓廷、尹兆堅等人係威係勢發起「天下為公」行動，口口聲聲話要追究有關全國政協副主席梁振英嘅UGL事件，最近仲好高調咁去英國見外國政客、民間組織，話搵人幫手繼續「追查」；殊不知英國人玩政治高林卓廷呢啲小學雞十幾班，老早睇穿呢班政棍借英國執法機構做騷，所以喺佢哋人都未離開英國嘅時候，National Crime Agency（NCA）就表明無足夠證據繼續查UGL，即係英國執法部門都覺得無Case可言囉！林卓廷等人唔顧事件無Case硬要問市民攞錢跟進，而家係咪時候應該「回水」，嘔番市民啲血汗錢出嚟先？！

NCA表明不再跟進

根據梁振英自己收到NCA嘅來函，NCA經過小心研判，得出「根據取得嘅資料，並沒有足夠證據要繼續進行調查」嘅結論；而林卓廷亦喺Facebook貼文證實事件，NCA發出嘅公函寫明NCA嘅決定係冇乜可能會改變不作調查嘅決定；囍雨嘅解讀，就係人哋覺得事件冇乜可以查，就算你班香港政客再煩、再迫我都冇用！NCA嘅決定，可以話係大大力摑咗林卓廷等人一巴掌，但林卓廷似乎仲要「跌咗落去嗱番炸沙」，表示對NCA決定非常失望，仲話要繼跟進UGL事件。咪住先，咁講法，即係林卓廷等人唔認衰，仲要繼續用市民嘅捐款做政治騷？有冇搞錯！

老實講，所謂UGL事件，本來就係普通不過嘅離職協議，梁振英、UGL、政府甚至率先報道事件嘅澳洲傳媒講清楚事件，種種事實顯示協議係各方知情嘅離職協議，而根據行會申報制度行會成員亦唔需要就離職協議作出申報；英國方面，除咗NCA決定唔調查之外，其實另一執法部門Serious Fraud Office（嚴重詐騙局）亦早就表示過UGL已經結案。林卓廷等人喺清楚各方面證據嘅情況之下堅持炒作UGL，呢啲擺明就係政治操作，表面為公義，實則就係玩政治攻訐、玩抹黑；囍雨覺得，如果林卓廷仲要啲廉恥，除咗向梁振英道歉之外，絕對有需要將用咗嘅公眾捐款攞番出嚟，為自己嘅錯承擔後果。

用耗盡市民數十萬元款項

對於林卓廷等人用咗「天下為公」（即市民捐款）幾多錢，至今係一個謎，因為林卓廷上次同尹兆堅佢哋開記者會，只係一、兩句話啲單未番，下次先報告用咗幾多錢，而將款項問題輕輕帶過；囍雨上「天下為公」嘅Facebook專頁睇，根據佢哋喺6月21日公布嘅財政報告，林卓廷等人用喺捐款網站、拍攝影片、專業服務等費用大約有47萬港元；囍雨估計，佢哋而家用咗公眾50萬港元以上係最少架喇。林卓廷、尹兆堅等人作為政黨高層、立法會議員，用咗市民幾十萬畀「自己玩」，而家場政治騷爛尾收場，佢哋用咗市民幾多錢，係咪應該賠番出嚟呢？如果唔會嘅話，即係「屈人唔成功」，仲要市民幫佢哋找埋條數？點講都好似唔通喎！

所以，從今開始，但凡有人提起林卓廷等人嘅「天下為公」，大家只要回應幾個字，就係「林卓廷，回水」！

原圖：林卓廷Facebook專頁