呢排幾間大學以至其他大專院校相繼舉行開學禮，繼港大、教大、中大以至浸大學生發表「港獨」或者疑似「港獨」言論後，噚日恒生管理學院學生會會長李翔鵠喺開學禮上面亦主動提及香港民族黨面臨被禁止運作一事，佢聲稱警方曲解《社團條例》，話係政治打壓；當被問到係咪支持「港獨」嘅時候，李翔鵠就話鑑於「港獨」未有完整論述，所以暫時唔會主張「港獨」。到底「暫時」唔主張係咩意思呢？同埋李翔浩公開力撐「民族黨」，用意都好明顯下喎！

先為「港獨」開言路？

雖然恒管學生會會長李翔鵠無講明要爭取「港獨」，但佢就講到明自己喺致詞入面已經提及咗「民族黨」，並且強調任何主張嘅可行性並唔重要，重要嘅係有冇討論空間，自己唔提「港獨」係因為唔希望排除其他主張。綜觀李翔鵠嘅言行，同埋佢話「暫時」唔主張「港獨」，廣男理解到嘅意思，大概就係支唔支持都好，討論「港獨」冇問題，同埋而家「港獨」冇完整論述所以唔支持，將來就好難講喇。

廣男就認為，李翔鵠嘅套路，同其他大學生代表以至違法佔領發起人戴耀廷嘅套路都係類似嘅。佢哋第一個「辯護理由」，就係「唔好講支唔支持，我哋大學入面自己討論下得唔得先？如果咁都無唔比，咁仲有學術、言論自由嘅？」；至於第二個「辯護理由」，就係「當我而家唔支持，但遲啲如果形勢有變化，或者『港獨』嘅論述更完整，我哋可能會支持架！」。呢種先要求討論「港獨」，以及待「形勢有變化」再睇下係咪要搞或者支持「港獨」嘅套路，廣男稱之為「漸獨」！

違法之事 還要討論？

其實「港獨」違法，又係分裂自己國家嘅行為，咁中間有乜討論空間呢？說穿了，「獨派」是溫水煮蛙，「漸獨」是溫水煮蛙，「漸獨」慢慢煲熟你，就如戴耀廷所說，當修件成熟時，香港有獨立的可能性，今天他們就是在製造條件，可恨的卻是，戴耀廷等政客只會推人哋啲仔女出嚟抗爭，而自己啲仔女就要好好讀書，甚至要谷到入大學讀Law。原因好簡單，送死要搵其他人子女，搵食梗係留畀自己子女啦！ 

原圖：RTHK