颱風吹襲日本，搞到關西國際機場封埋，好彩被困機場嘅大批中國國民，足足1,044人，喺中國領事館安排下已經全部安全疏散，離開咗呢個「封鎖的機場」。關西情況咁慘，偏偏香港有啲本土政客就係都要搵關西機場嚟抽水；嗰個平日扮晒環保份子、實質非常「本土派」嘅新民主同盟區議員譚凱邦，竟然無啦啦將關西機場水浸一事，同建議中、未拍板嘅東大嶼人工島拉埋嚟講，拎日本嘅災難嚟抽政治油水，呢個政黨啲人都幾卑鄙喎！

人工島非必然會沉降

首先要解釋下，關西機場同人工島有咩關係呢？查實，關西機場位處嘅地方係由填海而嚟嘅，整個填海工程足足用咗五年時間，呢幅「從冇到有」嘅用地面積接近5.11平方公里咁大。好喇，咁點解關西機場喺今次風災度會搞到水浸呢？查實係因為關西機場坐落嘅人工島不斷沉降，出事前機場地面距離水平線只係得4米，打起風上嚟自然水浸啦，呢個唔難理解吖。

好喇，咁到底囍雨覺得呢件譚凱邦有咩問題呢？佢話喎，東大嶼人工島係一個好大機會水浸、沉降、甚至隨時斷絕對外交通的「孤島」，仲話「今日關西機場，明日東大嶼人工島」添，總之就講到一旦東大嶼人工島成事，未來就必然會出現同關西機場個人工島一樣嘅沉降幅度，呢種咁唔準確嘅表述，咪就係危言聳聽兼抽水囉！

專家見解秒殺譚凱邦

嗱，譚凱邦，等囍雨教精你呢啲門外漢啦，據工程師學會前會長陳健碩解釋，關西機場人工島下面因為有300至400米沉積土同好厚嘅淤泥，所以好易出現沉降；相反，以香港赤鱲角機場人工島為例，因為人工島下面係堅固嘅花崗岩，沉積土相對較薄，加上喺興建機場前已經將海底淤泥挖走，故此香港機場人工島沉降問題一啲都唔嚴重，完全係安全同合理水平。

囍雨引專家意見係想帶出咩呢？就係想話畀大家知，譚凱邦根本就係製造恐慌、危言聳聽！人工島，並唔係一定會出現嚴重沉降，最重要係視乎海床結構，以及施工時有冇好好咁清走海底淤泥。冇錯，今日關西機場人工島的確係出現嚴重沉降，但正正因為有前車之鑑，他日東大嶼人工島若然真係上馬，乜佢覺得香港專業人士會刻意咁重蹈覆轍咩？唔通仲會特登選一個有好厚沉積土同淤泥嘅位置咩？唔好傻啦！

本土派政客 製造恐慌

挑出一個極端個案嚟概括一個複雜工程，譚凱邦呢種手法咪就係混淆視聽囉！老老實實，囍雨冇研究東大嶼人工島呢個議題，如果社會有其他更好增加土嘅方案，咁唔起都唔係大問題；囍雨最睇唔過眼係呢啲所謂本土派政客，真知灼見就冇喇販賣恐嚇、蠱惑人心就大把，譚凱邦今次仲要拎日本天災嚟抽水，咁卑鄙嘅事都做得出，稍有良知嘅人都唔會再撐佢囉！

原圖：譚凱邦Facebook